Greenland.com nersornaasigassatut piukkukkaat
Kalaallit Nunaata takornariaqarnermut tunngasuni nittartagaa internettimi Oscarinnatsitsisarnermi takornarianut nittartakkat pitsaanerpaartaattut nersornaaserneqartussatut innersuunneqarpoq
Takornarianut nittartakkat ilaatigut New Yorkimut New Zealandimullu tunngasut akornanni Kalaallit Nunaata takornariaqarnermut tunngasuni nittartagaa greenland.com Webby Awardimik "takornariaqarneq"-rup ataani nersornaaserneqartussatut innersuunneqaqqammerpoq.
The Webby Awards tassaavoq internettimi ukiumoortumik Oscarinnatsitsisarnermut akissutit akuerisaanersaat, 1996-imiilli siullermik San Franciscomi kingornalu New Yorkimi ukiut tamaasa pisarsimasoq.
Innersuunneqarneq Kalaallit Nunaannut takornariaqarnermullu siunnersuisoqatigiinnut nersualaarinninnerujussuartut isumaqarfigisani Visit Greenlandip pisortaata, Anders Stenbakkenip nuannaarutigaa.
- Nunatut mikisutu nittartakkamik nunarsuarmi takornarianut nittartakkat pitsaanerpaartaannut nallersuussinnaasumik pilersitsisinnaagatta Kalaallit Nunaat sinnerlugu tulluusimaarutigisorujussuuarput. Ukiup ataatsip missaata matuma siorna nittartaga pilersikkatsigu Atlantikup avannaani nunanilu avannarlerni nalinginnaasumik nittartakkanut pitsaanerpaanut kusanarnerpaanullu ilaanera qularinngilarput, maannali greenland.comip nunarsuarmi pitsaanerpaat akornanniinneranut uppernarsaatissaqalerpugut, pisortaq nuannaaqisoq oqarpoq.
Ornigassat angisuut
New Yorkip, New Zealandip – Kalaallit Nunaatalu – takornarianut nittartagaasa saniatigut nittartakkat marluk innersuunneqarput, ataaseq Canadameersoq ataaserlu nunarsuaq tamakkerlugu takornariaqarnermik sammisaqartoq.
- Ornigassat angisoorujussuit nittartakkallu millionerpassuarnit alakkarneqartartut angallavissallu Kalaallit Nunaannit ilisimaneqarnerujussuit sakkortuumik unammillertigaavut, taamaattumik innersuunneqarnerinnarpulluunniit naammagisimaartorujussuuarput. Kisianni ajugaariataassagaluarutta imaassinnaavoq champagnemik puiaasamik ataatsimik marlunniilluunniit ammaasugut, Anders Stenbakken nuimaniarpalugani oqarpoq.
The Webby Awards maajip 21-ani New Yorkimi agguaanneqassaaq, immikkoortunili asigiinngitsuni ajugaasut maajip aallaqqaataani tamanut saqqummiunneqariissapput. Immikkoortuni tamani nersornaasiissutissat marluupput: nersornaat internettimi atuisartut taasinerisigut tunniunneqartussaq nersornaallu naliliisartunit Amerikamiunik nuimasunik inuttalimmit nittartakkanik innersuunneqartunik tamanik misissueqqissaartunit taasissutigineqartoq.
Naliliisartut tusaamasat
Naliliisartut tusaamasanik inuttaqarpoq ilaatigut nipilersortartoq David Bowie, Internettimik nassaaqataasoq Vinton Cerf, tv-miittartoq tusaamasaq Martha Stewart, Instagramimik tunngaviliisoq Kevin Systrom, tusagassiuutilerisoq tusaamasaq Arianna Huffington, Flickr-imik pilersitseqataasoq Caterina Fake, "The Simpsons"-inik pilersitsisoq Matt Groening aamma Twitterimik pilersitseqataasoq Biz Stone.
Greenland.com marsimi 2011-mi Visit Greenlandimit pilersinneqarpoq ineriartortinneqarlunilu Kathart Interactivemit – digitaliusumik tamakkiisumik kiffartuussivimmit internettimi atuisartunut misigisassanik ilusilersuinermik ineriartortitsinermillu immikkut ingerlatalik.