Sulisut pisut kamaatigaat
Naalakkersuisoqarfimmi pisortaq Ann Birkekær Kjeldsen peqqissutsimullu naalakkersuisoq Agathe Fontaine annertuumik isornartorsiorneqarput
- Dronning Ingridip Napparsimavissuani sulisut akisussaassuseqanngitsumik iliuuseqartoqarnera sakkortuumik uparuarniarpaat Peqqissaaveqarfimmilu Qullersaallutik Aqutsisut suliaannik ataqqinninnginnertut nalilerlugu taamaammallu suliaq pillugu avataanit misissuisoqarnissaa piumasaralugu, taamatuttaaq Naalakkersuisut Siulittaasuat, Kuupik Kleist, kaammattorniarpaat suliami pisut pillugit ersarissaaqqullugu taamaaliornikkut Kalaallit Nunaanni Peqqissaaveqarfinni suliffeqarfinni toqqissilluni sulineq ingerlaqqissinnaaqqullugu.
Taama oqaluttuarpoq nakorsaaneq Ole Lind Nuummi Dronning Ingridip napparsimmaviani sulisut sinnerlugit.
Læs "Alle vil have en snarlig løsning"
TUSAGASSIUTITIGUT NALUNAARUT
Dronning Ingridip Napparsimmavissuani sulisut ullaaq manna katersuupput ataatsimeersuarlutik
- Ataatsimiinnermi peqataasut Peqqissaavimmi Aqutsisut Kalaallit Nunaanni Peqqissaavinni Qullersaallutik ingerlatsinermut aqutsisut akuersaarneqarsinnaanngitsumik iliuuseqarnerat tupigusuutigisorujussuuaat. Peqqissaavinnik Aqutsisut, Peqqissutsimut Naalakkersuisoqarfimmit annertuumik akuliuffigineqartumik, suliunnaarsinneqarput suliffimminnillu qimagutitinneqarput taamaaliortoqarneranilu Naalakkersuisoqarfik nammineq suliassaqarfimmini pisunik misissuinermik aallartitsivoq. Naalakkersuisoqarfik suliami nammineq akuliusimalluinnarfimmini imminut misissortussanngorpoq, Ole Lind oqarpoq.
- Naalakkersuisoqarfimmi suliami pineqartumi akisussaasuusumit, tassa Naalakkersuisoqarfimmi Pisortamit nassuiaateqartoqarsimanngilaq, soorluttaaq Peqqissutsimut Naalakkersuisoq (Agathe Fontaine, aaqq.) suliami qisuariarsimanngitsoq, Ole Lind oqarpoq.
Ilaasortanit sisamaasunit pingasut
Peqqinnissaqarfiup aqutsisoqarfiani pisortaq Kurt Nielsen, nakorsaaneq Carsten Thordal aamma peqqissaasut pisortaat Lisbeth Lumby Rasmussen sapaammi marsip 25-ani suliunnaartitaapput. Nunatsinni peqqinnissaqarnikkut pisortanit sisamaasunit pingasut suliunnaartinneqarput "eqqumiitsumik akissarsititsisarnerminnut" atatillugu.
Tamanna Ann Birkekær Kjeldsenip siusinnerusukkut Sermitsiaq.AG-mut oqaatigaa. Ullumikkut Ann Birkekær Kjeldsen oqaaseqartissinnaasimanngilarput.