Skip to main content

Igalaat tarraanni

Aliortukkat ersinartullu nuannarigukkit AG poorskimi saqqummersoq atuaruk, tassani atuartartut 21't ersinartulersaarutaat ilaapput. Aana ataaseq Pavia Møllerip oqaluttuarisaa:

AG poorskimi saqqummersumi atuartartut namminneq oqaluttuaat quilertanarput assullu alutornarlutik. 

Aaqqissuisoqarfimmi nassiussanik atuffattut quilertallutillu nuannisavipput poorskimi aviisimut ilanngussassat atuffakkamikkik. Pavia Møllerip allaaserisaa "Igalaat tarraanni" nuannarineqarluarpoq. AG'mi aaqqissuisoqarfiup Pavia Møllerip oqaluttuaa pitsaanerpaatut toqqarpaa, taamaattumik Pavia Møller naasunnatsinneqarpoq checkimillu 3.000 koruuninik nalilimmik nassinneqarluni. 

Sumiiffigisanni aviisi nungussimassagaluarpat oqaluttuat qiiaaminartut nittartakkakkut ugguuna pisiarisinnaavatit. Kisianni oqaluttuaq ajugaassutaasoq uani akeqanngitsumik pissavat.

.... Unnuit ilaanni ilakka innakaareersut errugassaqarmat, erruinermut allarut tuermiuliussinnarlugu erruerusaalerpunga.

Sila ukiassarluni taarsisalereersoq, iggavimmi igalaaq saallugu
erruerusaalerpunga. Tarrara igalaani erseqqaarippoq,
erruerusaarlungalu igalaani tarrara qiviarlugu takulerpara
inip teqeqquata nalaani nikorfasoqartoq. Ini
igaffillu ammaannartuugamik.

Eqqarsalerpunga:
- Kakkaak,nuliara sinissoriniarlugu.
Qungujoreerlunga tunummut nuliara qiviarpara.... Inoqang!
Eqqarsaammerlunga errukkakka nangillugit erruerusaalerpunga.
Isumaqarlungami inuk nikorfasoq.


Igalaat qiviaqqillugit inuk takusorisara inip
qeqqanut uannut qaninnerulaalersimalluni
qeqarsimasoq takulerpara. Tamatumuuna
ilisarnarluni! Inuk allarluinnaq qangatoortunik kalaallit atisaannik
amernik atisalersorsimasoq takulerpara. Tupaammerlunga tunummut
qiviarpara. Inoqang!


Ammut saallunga, ersiummerlunga errukkakka nangillugit
errueqqilerpunga. Qamuunartakkulli annilaangalersutut misigaanga.
Soormiuna igalaap tarraatigut inuk taanna taamaallaat takusinnaagiga?


Ersisorsuullunga ammuinnaq isigalunga, igalaat qiviarnaveersaarlugit
errukkakka naammassiniarsarilerpakka.
Soorluliuna tununnut pisoqartoq! Arriitsorsuarmik igalaat
qiviaqqippakka! Tamatumuuna inuk taanna tunoorannguanni, siutima
nalaanut kiinnani pisillugu pisimavoq!


Nillertorsuarmik pukusukkut soorlu supineqartutut misigaanga,
ersiummernerujussuullu tikippaanga. Erruinermut allarut tuinniittoq
tigullaataa, nilliaatigalunga inuk taanna tunoorannguanni nikorfasoq
erruinermut allarummik isariallaataa, arpaasaannaq nuliara
sinittarfimmi sinittoq tinngivigiisaannaq innarfigaara!


Nuliara tupalluni itertoq, ilami innarnera
sorraakkunarnermik, aperaanga sunersunga.
Akivaralu:
- Qiiaammernermik, ilinnullu kipilerama
innarfigaakkit neriullunga itissasutit.


Nuliara ersilersikkumanagu taamatut oqarfigiinnariarlugu
eqerujussuarlugu sininniarsarilerpunga. Sininniarneq taamani
erloqinaqaaq. Ilami nuliara attuuillugu allamut saassinnaananga
taamani sinippunga.

Soorlumi tassa siniffitsinniitillunga tunumut qiviaruma, inuk taanna igalaat
tarraanni takusara suli tunoorannguanniissasoq!


Aqaguani makikkatta nuliama tupigaa qulliit ikumatiinnarlugit,
errukkallu naammassinagit innarsimagama. Meeqqallu atuariartorlutik
aniariarmata, nassuerlunga oqaluttuaraara unnuaammat
misigitinneqarsimanera.


Nuliamalu quiassuaatigalunga oqarfigaanga:
- Immaqaana aliortukkat errueqqusimanngikkaatsit!
Kingusinnerusukkut sanilitta ilaannit oqaluttuunneqarpugut ineqarfik
najugaqarfigisarput aliortuarfiusaqisoq....

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER