Aalborgimi sungiussilluartut
Ilaqutariit Kalaallit Nunaannit nuunnissartik toqqarsimavaat. Sermitsiaq.AG kaffillertunukarpoq - Danmarkimut nuunnerannit ukiut marluk qaangiunneranni
Ukiut marluk matuma siorna Lene Eriksen Lyberth Jens-Ole Skovilu nukappiaqqat Carlo, Aputsiaq aamma Frederik ilagalugit Aalborgimut nuunniarlutik aalajangerput.
Lenep angajoqqaavi, Kristian og Else Lyberth, aamma nooqataaniarlutik aalajangerput, Lenep nukaa Herlevimi najugaqarmat.
Arfininngornermi Aalborgimi Ravnkildevejimi kaffillertoqarpoq nukarleq Rene marsip 27-iani angajumi Carlop 19-iliinera eqqorlugu inuuissiormat.
Ilaqutariit aallartinnatik ungasinngisaminni najugaqarsinnaanertik takusinnaagamikku periarfissamik tigusipput ullumikkullu Aalbor Østimi imminnut 250 meterinik ungasissuseqarlutik najugaqarlutik, kinguariinnilu marluusuni tamarmik ulluinnarni imminnut qaninnertik iluarisimaarpaat. Kinguaariit taakku marluk sungiussisimalerput. Aataa Kristian VVS-ilerisut suliffeqarfianni suliffittaarsimavoq Aanaalu Else soraarnerussutisiaqarluni tutsarluttutullu ikiorneqarnissamik neqeroorfigineqarnini ilaqutariit Kalaallit Nunaanni amigaatigisimasaat iluarisimaarnerarlugu.
Anaanaq Lene inunnik isumaginninnermi siunnersortaavoq, maannalu Rene ataatsimik ukioqaleqqammersoq erninermut atatillugu sulinngiffeqassutigalugu. Jens-Ole pisortani aqutsinermi bachelorinngornialeruttorpoq 2014-imilu naammassinissani naatsorsuutigalugu. Lenep Jens-Olellu immikkut qitornaat qatanngutissariilersut: Carlo ungdomsskolemi atuarpoq, Aputsiaq aamma Frederik Aalborgimi meeqqat atuarfianni atuarput. Taakkulu aamma iluarisimaarinnillutik.
Kinguaariinnit marluusunit peqqinnissakkut atuarfeqarnikkullu pissutsit Kalaallit Nunaanni pissutsinit pitsaanerunerannik iluarisimaarinnipput. Peqqinnissaqarfik aanaamut Elsemut tutsarluttuusumut siunnersuutinik, ilitsersuutinik iluaqusersuutinillu atugassaqartitsivoq. Atuarfillu taarseraattuartunik ilinniartitsisoqanngitsoq atuartunik isumaginnippoq.
Nuunnerup kingorna pingaartumik aallaqqaammut angerlarsersimapput, ullumikkullu qaqutigooraluartumik angerlarsileraangamik Kalaallit Nunaanni umiatsiarluni angalaarnermit videolianik isiginnaartarput. Taamaattumik nuunnermit ukiut marluk qaangiunneranni kinguaariit marluusut arfininngornermi kaffillernermissut imminnut qanitariinnertik iluarusuutigaat.