Aalborg Universitet inatsisilerituutut ilinniakkamik Kalaallit Nunaanni pissutsinut immikkut sammitinneqartumik pilersitsisussanngorpoq.

Ilinniagaq nutaaq AAU-p Ilisimatusarfimmut ukiuni tallimani suleqatigiinnissamik isumaqatigiissutaani nutaami immikkoortortanut ilaavoq. Ilinniagaq nutaaq aqqutigalugu kalaallit inuusuttut amerlanerit inatsisilerituutut ilinniagaqartalernissaat universitetinit taakkunannga marlunnit ilimagineqarpoq, Kalaallit Nunaannilumi eqqartuussiveqarneq inatsisilerituunik pisariaqartitsisorujussuuvoq, Kalaallit Nunaata Universitetiani rektori, Tine Pars, ilisimatitsivoq.

Inatsisilerinerup atuartitsissutitut toqqagassanik Kalaallit Nunaannut immikkut attuumassutilinnik soorlu aalisarnermut aatsitassarsiornermullu tunngasunik tapertaqartinneqarnissaa eqqarsaataavoq. Aallaqqaammut ilinniagaq ilinniartunut ukiumut qulinut inissaqartitsisussaq Aalborgimi ingerlanneqassaaq, siunissamili ungasippallaanngitsumi inuusuttunit 1. semesterip Ilisimatusarfimmi Nuummiittumi ingerlanneqarsinnaalernissaa neriuutigineqarluni.

Ilinniakkap kalaallinut ilinniartunut taamaallaat tunngatinneqannginnera ilinniartulli kikkulluunniit inatsisilerituutut ilinniakkamik Kalaallit Nunaanni pissutsinut naleqqussakkamik soqutiginnittut tikilluaqqusaanerat maluginiarneqassaaq.