Skip to main content

Nuannarinnittunut filmit

 Katuaq inunnut nuannarisalinnut filminik pitsaasunik filminillu piviusulersaarutinik nalinginnaasumik takutinneqarneq ajortunik takutitsisalerpoq

 

Art Cinema, Katuap filmertarfianut atasoq, filminik Hollywoodip filmiliarsuarinngisaanik, allaanerusunik nuannarinnittunik takutitsisalerpoq. Tamakkua tassaapput filmit pitsaasut filmillu piviusulersaarutit, filmertartunit imatorsuaq ornigineqarneq ajortut, filmiliaalluartulli.

 

Art Cinema ukiup affaata matuma siornatigut aallartisalerpoq filmi piviusulersaarut »Page one: Inside The New York Times« takutinneqarmat.

Katuami filmertarfiup pisortaata Bill Beringip kissaatigisimavaa filminik allanik, Hollywoodimi filmiliarsuarnit nuannarineqartunit allaanerusunik, Katuami takutitsisalernissaq, taamaattumillu Art Cinema allartinneqarpoq.

– Pitsaasorpassuarnik filmiliaqarpoq filmertartunut amerlanerusunut takutinneqarneq ajortunik, taamaakkaluartorli filmfestivalini assigiinngitsuni nersornaaserneqartartunik. Takutikkusuppara allanik filmeqartoq takuneqartariaqartunik. Filmimmi ataasiinnarmik samminninngillat. Filmit suut tamarmiupput. Sinnattorinissaat qunugineqanngiinnassaaq, taava filimimik qanorluunniit iliortoqarsinnaavoq. Tamannalu tamarmi Art Cinema-mi isumassarsiaavoq. Isumassarsisitsineq, oqallitsitsineq pingaarnerusumillu nuannersumik misigisaqarneq, ikinngutit ilagalugit filmeriarluni kingornalu cafémi filmi oqaloqatigiissutigalugu, Bill Bering oqarpoq.

 

Taassuma Århusimi filmertarfik allaanerusoq Øst for Paradis suleqatigilersimavaa, taannalou qaammammut marloriarluni filminik Katuamut nassiussisassaaq.

- Filminut mikisunut tuniniaavik annertoorsuunngilaq. Siunertarineqanngilarmi inuit 1000-t filmi takussagaat. Pigeriikkatsinnut allaanerusumik neqeroorutaannaavoq, Bill Bering oqarpoq.

 

Filmit killitsinnartut

 

Bill Beringip takutikkusuppaa filmimi aamma paqumigisat sammineqartartut, toqu allalluunniit, Hollywoodimi sammissallugit qunugineqartut, oqaluuserineqartarlutik.

–      Soorunami Hollywood ilaannikkut taamaasiortarpoq, europamiulli filmiliaattut samminagit. Europamiut filmiliullaqqissorujussuupput sammisat killitsinnartut sammisarlugit. Europamiulli filmiliaat kisiisa takutittassanngilagut. Islandimit Sydafrikamilluunniit pitsaasumik filmiliaqarpat soorunami takutissavarput. Killiliisoqassanngilaq. Filmitigut inuit ilisimasaat annertusarneqassapput, Bill Bering oqarpoq, neriuutigaalu filmertartut, pingaartumik inuusuttut, filmit, Hollywoodimi filmiliarineqanngitsut, allat nuannarilissagaat.

 

Malittarisassat immikkut ittut
- Filmit dvd-kut takutinnissaannut immikkut ittunik malittarisassaqarpoq. Filmiliatut filmertarfimmi takutitassatut takuteqqusaanngilagut. Dvd-t tamanut ammasumik takuteqqusaanngillat nammineq kisimi atugassiaallutik, taamaattumik takutinnissaanu filmselskabimit immikkut akuersissuteqartariaqarpoq. Tamannalu kigaatsumik eqqissillungalu sulissutigisimavara. Øst for Paradis kisiat isumaqatigiissuteqarfiginngilara, ammali filmselskabeeraq Mirakel Film isumaqatigiissuteqarfigaara, taassumalu filmi »Page one: Inside The New York Times« uagutsinnut pissarsissutigisimavaa, siorna ukiakkut takutinneqartoq, Bill Bering oqarpoq.

 

Ataasinngormat marsip 19-ianni italiamiut filmiliaat »Rød som himlen« takutinneqarpoq. Filmi tulliuttoq tassaavoq »Sarajevo, Håbets sang«, apriillip 2-anni takutinneqartussaq.

Filmit Art Cinema-mi takutinneqartartussat Katuami takutinneqannginnerini Ugeaviisip nalunaarutigisassavai. Nalunaarutiginninneq siulleq aviisimi uani atuarsinnaavat, nalunaarutigineqarluni »Sarajevo, Håbets sang«..

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER