Meeqqat sumiginnakkat ikiorneqarnerat pitsaaneq

Sulisut suliamik ilinniagaqanngitsut avinngarusimasuni najugallit meeqqanik sumiginnakkanik sullissinissamut pikkorissartinneqarput

Assersuutitut assilisat: Leiff Josefsen

Meeqqanik sullissinissamut suliamik ilinniagaqanngitsut meeqqanik sumiginnakkanik sullissinissaminnut paasisaqarnerupput, ilinniagaqarnerulerlutik iliuusissaminnillu sakkussaqalerlutik.

Taama nalunaarpoq Foreningen Grønlandske Børn, Nunatta sineriaani ilinniartitseqqinneq ingerlappaat "Meeqqat aamma sumiginnaaneq" taasaminnik. Siullermik Avannaani Tunumulu kingullermillu Nanortalimmi.

Pikkorissartitsineq kingulleq Kommune Kujalleq suleqatigalugu 2011 ingerlanneqarpoq maanna nalilersorneqarluni naammassivoq pitsaasumik angusaqarsimalluni.

- Ilinniarnerup siunertaraa meeqqanik sumiginnakkanik ilisimasaqarnerulernissaq aammalu najugaqarfimmi ajornartorsiummik qaangiiniarluni nukittorsaanissaq. Ilinniartinneqartut tassaapput suliamik ilinniarsimanngitsut, taakkuummata illoqarfinni nunaqarfinnilu avinngarussimasuni meeqqanik inunnillu isumaginninnermik suliaqartartut.

- Inuit tamakku amerlasoorpassuartigut meeqqanik sumiginnakkanik takunninnissaminnut sakkussaqartanngillat qanoq iliuuseqarsinnaasaratik, Foreningen Grønlandske Børn nassuiaapput.

Peqataasut 16'init Nanortalimmi ilinniakkamik naammassinnipput. Naliliineq naapertorlugu ilinniarnermik peqataasut tamarmik pissarsiaqarluarput:

  • Sumiginnaaneq pillugu annerusumik ilisimasaqalerput.
  • Inatsisit naapertuuttut taperneqarnissamullu periarfissat paasisaqarfigineruaat.
  • Ulluinnarni sulinerminni ilikkakkat nutaat atorpaat
  • Meeqqanut sumiginnakkanut taakkualu ilaqutaannut inatsisisit naapertuuttut taperneqarnissamullu periarfissat annerusumik paasisaqarfigaat
  • Meeraq atugarliortillugu qanoq iliuuseqarnissaminnut sakkussaqarnerulerput
  • Suliamut tunngasunut isumasioqateqarnissamut nutaanik sakkussaqalerput

Peqataasut ilaat oqarput:

  • - Ilikkarpara meeraq ikiortariaqartillugu ingerlaannaq ikiuuttassasugut
  • - Suliffitsinni oqaluuserisarpagut takusinnaallugu sukkut iluarseeriassalluta - meeqqat angajoqqaap pillugit ajornartorsiutaat ersarinnerulerput

Peqataasut meeqqanik sumiginnakkanik taakkualu angajoqqaavinik ulluinnarni sullissinerminni atorsinnaasaminnik sakkussaqalerput, sulisut suliamut ataatsimoorussinerat nukittorsarluni. Attaveqaqatigiinnik pilersitsipput meeqqanik sumiginnakkanik taakkualu angajoqqaavinik sullissinermi ineriartortitseqqinniarlutik ikiorfartortaasussaq.

Ilinniartitsinerit taamaattut siornatigut Qaanaami Tasiilami Ittoqqortoormiunilu ingerlanneqarput. Taakkunanit misilittakkat Kujataani ilanngullugit atorneqarput. Sulisunut suliamik ilinniagaqanngitsunut ilinniartitsinerit marsimiit oktobari ilanngullugu Upernavimmi, Uummannami Kangaatsiamilu ingerlassapput.

Ilinniartitsisuupput siunnersorti aamma inunnik isumaginnittoq Nukákuluk Kreutzmann aamma psykolog Inuk Borup-Nielsen. Ilinniarneq aaqqissuunneqartarpoq kommunini inunnik isumaginnittoqarfiit qanimut suleqatigilluinnarlugit.

Powered by Labrador CMS