Skip to main content

SIK: Suliffiit nunatsinni pigiinnarneqarlik

- Nunatsinni suliffiit attatiinnarneqassapput, ineriartortinneqassapput aamma Nunatsinni ingerlateqqinneqassallutik, SIK-p siulittaasua, Jess G. Berthelsen, erseqqissaavoq

Naqitat A/S-ip qanittukkut Nuummi naqiterivimmut nutaanut nuunneranut atatillugu oqaaseqarnermini SIK siulittaasuat Jess G. Berthelsen naqissusiivoq, "Nunatsinni suliffiit attatiinnarneqassapput, ineriartortinneqassapput aamma Nunatsinni ingerlateqqinneqassallutik’”.

SIK’p Suliffissanik Nutaanik Pilersitsiniarnermut Aningaasaateqarfiata ullumikkut Naqitat A/S-ip aktiaataasa 25 %-ii pigai

- Suliffiit Nunatsinni pigiinnarneqarnissaat pissutigerpiarlugu SIK naqiterivimmut aningaasaliissuteqarpoq, Jess G. Berthelsen nassuiaavoq.

- Maani nunatsinni sullitat killeqarmata suliffeqarfiillu amerliartuinnartut, aamma Namminersorlutik Oqartussat, suliassat nunanut allanut suliassanngortittarmatigik Naqitat A/S kalaallinik 14-inik sulisoqartoq maannakkut tatisimaneqalerpoq matuneqarnissaminullu nalorninartorsiorluni. Naqiterivik matuppat sulisui 14-it suliffissaarutissapput. Suliffiit 14-it assigaat Danmarkimi suliffiit 1400-t. Tappavanilu imaannaanngitsumik tamanna nilliaatigineqassaaq, Jess G. Berthelsen nassuiaavoq. 

 

Nunatsinni aaqqiissutissarineqarsinnaasut ujartorneqarput

’Nunami angisuumi inuuvugut, tamaanilu angallanneq akisoorujussuuvoq, inuillu ikittunnguuvugut taamaattumik suliffeqarfiit tunitsivigisinnaasaat amerlanatik. Tamanna pissutigalugu europamiut aaqqiissutigisartagaat nunami maani amerlanertigut atorsinnaasanngillat. Periarfissat ilaatigut pisariaqarluinnarpoq innuttaasut tamakkerlutik tapersersoqatigiinnissaat.

Uani suliffeqarfik pineqartoq ukiuni 155-ini atuussimanerminik oqaluttuassartaqarpoq. Qanga kulturikkut pingaarutilittut suliffeqarfiusoq, ullumikkut suliffeqarfik nutaaliaq nutaamik illutaqartoq aamma atortorissaarutit nutaaliat pigalugit pitsaassutsiminnut naleqqiullutik pisisarfinnut allanut naleqqersuunneqarsinnaalluartut. Kisianni suliakkiissuteqartoqartanngilaq, kaaviiaartitallu aarlerinartumik ikiliartuinnarlutik.

Soorlu iloqqutsiinnarluni

Sullitat sipaarniarlutik suliassaatitik nunanut allanut suliakkiissutigisarpaat, tamannalumi paasinarpoq. Kisianni inuiaqatigiit aningaasaqarniarnerat eqqarsaatigalugu soorlulusooq kissaammerniarluni iloqqutsiinnarneq. Tassami aningaasat nunamit anninneqaannarput. Naqitigassat nunami maani naqiterneqaraluarpata taakku 60 %-ii inuiaqatigiinnut akileraarutitut aamma aningaasarsiatut utissagaluarput, Jess G. Berthelsen oqarpoq nangillunilu:

- Suliniutigaarpummi Nunatta namminersulernissaa. Oqaaseq "namminersorneq" politikkikkut imaqanngitsumik oqaasinnaaginnaassanngippat pisariaqarluinnarpoq sulisartut aammattaaq inuiaqatigiinnik ingerlateqataanissaat. Tamannalu sulinikkut pisarpoq.

-  Maannakkorpiaq 10,5 % sinnerlugu suliffissaaleqiffiusumi suliffissat amerlanerusut annaassallugit akissaqanngilagut! Tamatumuuna tapersersoqatigiinneq takutittariaqarparput, aamma Namminersorlutik Oqartussat tamatumunnga aqqutissiuillutik sallerpaajusariaqarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER