Issittoq pillugu ataatsimiinnerit nuannaraat

Politikkerit, ilinniagartuut aamma immikkut ilisimasallit Ilulissani katersuupput Nunat Avannarliit Killiit siunnersuisoqatigiivisa Issittoq pillugu ataatsimiititsinerannut katersuullutik. Tamatuma saniatigut USA'mi inuit aamma taamaattut katersuupput

Assi: Sermitsiaq.AG

Nunat Avannarliit killerneersut, danskit aamma norskit politikkerii, ilinniagakkaat immikkullu ilisimasallit pingasunngornermi sisamanngornermilu Ilulissani Nunat Avannarliit Killiit Siunnersuisoqatigiivisa ukiumut ataatsimiisitsinera qulequtalik "Nunat Avannarliit Killiit nunat tamalaat akornanni inissisimanera Issittoq eqqarsaatigalugu".

Ataatsimeersuarnermi ujartorneqassaaq nunat tallimat ataatsimoorussamik soqutigisaat ukiuni qulikkaani qaangiuttuni pinngortitap silallu pissusaata allanngorneranit sumiiffimmut sunniutai aammalu nunat tamalaat akornanni ingerlatsineq. Silaannaap allanngoriartornerata nassataanik pinngortitaq Issittumi sunnerneqarujussuassaaq inuit tamaani suliniutaat aamma peqqutaallutik.

Inuiaqatigiinni aamma allanngorneqarpoq soorlu pinngortitami allanngortoqassasoq sumiiffimmi uuliamik, gassimik aatsitassanillu piiaanerit kiisalu Issittumi imaatigut angallaffiit nutaat atuutilernerisigut. Nunat arlallit - aamma Issittup sineriaanit - nunarsuarmi immikkoortortaq tikikkuminaatsoq soqutigileraluttuinnarpaat.

Nunat Avannarliit qitiusumik inissisimavoq
Suliniuteqalerusuttunit nutaamit nakkaannartitaajumanatik aammalu ineriartornerup sukkanerujussua pillugu pingaaruteqarpoq Nunat Avannarliit politikkikkut aalajangiisoqassatillugu qitiusumik inissisimanissaat, Issittup siunissaa pillugu. Tamanna Ilulissani ataatsimiinnerup qulakkeerniartussaavaa.

Peqataasut ilaatigut tassaapput Birger Poppel, Ilisimatusarfik, Rasmus Ole Rasmussen, Nordregio, Sven-Roald Nystø, immikkut siunnersorti Norgemi Árran Lulesamisk Senterimi aammalu suliniummik pisortaq Lene Kielsen Holm, Pinngortitaleriffimmit Klimacenterimit.

Issittumik soqutiginninneq nunarsuaq tamakkerlugu angeqaaq. Tamatuma saniatigut Nunat Avannarliit Killiit Siunnersuisoqatigiivisa Ilulissani ataatsimiinnerisa saniatigut USAmi University of North Carolina suliassaqarfiit marluk akimorlugit ataatsimiititsinermik aaqqissuussipput taasaminnik ”Who ”Owns” the Arctic?" (Kia Issittoq pigaa?) Taaguut canadamiup ilisimatuup atuakkiortullu Michael Buyersip atuakkiaata qulequtaanit tigusaavoq.

Amerikami Issittoq pillugu ataatsimeersuarneq
Amerikami ataatsimeersuarneq politikkerinit, ilinniagartuunit, ilinniartunit pinngortitalerisunillu peqataaffigineqartumi paasiniagassat arlaqarput soorlu issittumi nukissaqarniarneq pillugu aqutsinermi russit, canadamiut amerikamilu nunat inoqqaavisa isummiussaat.

University of North Carolina ulloq naallugu ataatsimiinneq pingasoqiusanngorlugu aggulugaavoq. Immikkoortup siullianni nunarsuup sinnerata Issittumik isiginnittaasiat. Sillimaniarneq, nukissaqarniarneq silaannaallu allanngornera immikkoortut aappaanni sammineqassapput, ullorlu naggaserlugu nunat tamalaat Issittumik qanga maannamullu suleqateqarnerat.

Amerikamiut immikkut ilisimasallit oqalugiarnerisa saniatigut Mary Simon, Inuit Tapiriit Kanatami siulersuisuat Issittumi nunap inoqqaavi sinnerlugit saqqummiissaaq aamma russeq Pavel Baev Norgemi fredsforskningsinstitutimi Priomi issiasoq kiisalu canadamit Michael Buyers, Unicersity of British Columbia saqqummiissallutik.

Ilulissani ataatsimeersuarnermi Issittumi innuttaasut eqqartorneqartut amerikami ataatsimiinnermi siku aappat nunap naqqanit erlinnartuutit qanoq pissarsiariniarneqarsinnaanerat eqqartorneqartussaq.

Powered by Labrador CMS