Skip to main content

Natop saliinermi ikiuunnissamut periarfissat missorpai

Sakkutuut Nunatsinneereernerisa kingorna saliinisami Natop ikiuunnissaanut periarfissat Natop pisortaata Anders Fogh Rasmussenip misissorniarpai 

Natop generalsekretæria taamatut neriorsuivoq Siumut sinnerlugu folketingimut ilaasortap Doris Jakobsenip apeqquteqarnera tunngavigalugu, taassumalu ippassaq folketingip illersornissamut ataatsimiititaliaani ilaasortat allat peqatigalugut Anders Fogh Rasmussen Natop Bruxellesimi qullersaqarfiani naapippaa.

Thulemi sakkutooqarfimmut tikeraareerluni uteqqammerluni Doris Jakobsenip apeqqutigaa Natop peqataaffigisaanik sakkutuunik nunatsinniittoqarnerata kingorna saliinermi Nato ikiuussinnaanersoq.

Anders Fogh Rasmussen oqarpoq Nato siusinnerusukkut Ukrainemi, Natop nunatut peqataaffigisaani, saliinermi ikiorsiisimasoq, maannalu misissorniarlugu sumiiffinni allani aamma Natop ikiuinissamut periarfissai.

- Nammaqatigiinnerussaaq peqqissumillu aaqqiinerussalluni Kalaallit Nunaanni sakkutooqarfitoqqani ingerlatanilu allani saliinermi Natop aningaasatigut ikiorsiinissaa. Ullumikkut Thulemi sakkutooqarfik Natop illersornissamut periusaanut ilaalersimavoq. Pissusissamisuuginnarpoq nunat Natomut ilaasortat ataatsimoorlutik saliinermi ikiuunnissaat, sakkutuut atortui mingutsitsippata igitassaappataluunniit, Doris Jakobsen siunnersuuteqarpoq.

Qanga ajortuliat akeqarput
Qeqertaasaq Dundas 2003-mi Kalaallit Nunaannut utertinneqarmat akiligassangaatsiaq ilaavoq. Qeqertaasami ilaatigut aqerlumik mingutsitsinerup kingorna saliinissaq suliassaq annertuneruvoq. Taamaattumik Danmarkimi Avatangiisinut ministereqarfik saliinissamut, naatsorsuutigineqartumut aasaru aallartinneqassasoq, 40 millioner koruuninik immikkoortitsisimavoq.

Siumut sinnerlugu folketingimut ilaasortaq malillugu suliassamik Danmarkip akisussaaffimmik tigusinera nersualaarnaraluartoq, tamanna siunissamut qulakkeerinerunngilaq, Doris Jakobsen isumaqarpoq.

- Suliassami matumani saliinissamik akisussaaffik Danmarkip tigusimavaa. Siunissamili taamatut suliassaasinnaasut? Danmarkip aamma akilissavai? Qanoq pisoqassava Kalaallit Nunaat arlaanni namminersortunngorpat suliassanillu nutaanik taamaattunik takkuttoqarluni? Doris Jakobsen aperivoq.

- Nunat Nato-mut ilaasortat tamarmik nunatsinni amerikarmiut sakkutooqarfiat atortuilu assingusut iluaqutigippatigit pissusissamisuuginnassaaq nunat Nato-mut ilaasortat tamarmik saliinermi ikiorsiinissaat, Doris Jakobsen tikkuaavoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER