Martin Møller pitsaanerpaaffissaminiippoq
Arctic Circle Race sioqqullugu sisoraatinik oqilaniuttartoq marloriarluni nunat tamalaat unammersuartitsinerini ajugaasuuvoq
Ukioq manna Arctic Circle Racemik ajugaasinnaasutut nalilikkat ilaat tassaavoq Martin Møller.
Ukioq manna oqilaniunnissarsuarmut piareersaatitut sisoraatinik oqilaniuttartoq, marloriarluni nunat tamalaat unammersuartitsinerini peqataavoq. Siulleq Finlandia Hiihto, maraton-World Cup’imi oqilaniunnerit marluk siullersaraat.
" ACR aallartiinnaqaaq" atuaruk
ACR aallartinneranit assit isiginnaakkit
- Ingerlaarfik 50 kilometerinit takineruvoq qattorngit siulliit ingerlaarfigereeratsigit pitsaanerit qulit akornanniilerpunga. Manissuinnaat arlallit aqqusaarlugit sisoraatikka perraannerat malugipallappara, arlalinnit qaangerneqarlunga, Martin Møller Sermitsiaq.AGmut oqarpoq, ullumi Arctic Circle Race qulinut aallartinngilaataani.
- Ilungersorlunga ingerlaqqinniarsariinnarpunga normu 28'ullunga apuullunga, cup'imut peqataaninni 3 pointinnallunga. Peqataaffigisama tulleraa Sverigemi Vasaloppet, oqilaniuffik 90 kilometerinik isorartussusilik.
- Vasaloppetimi angusaqarluarniaqaanga. Siullerpaat akornanni aallaqataanissamut akuerisaanikuuvunga, siulliit 100t akornanni - tamanna naleqartorujussuuvoq. Peqataasut 16.000upput. Sisoraatigissaarpunga aallaqqaataanit aallartilluaqalunga. Qattorngit siulliit qaangeratsigit normu 80 missaattut inissisimavunga. Taava pitsaasunik ingerlaqateqalerpunga aqqut tamaat pitsaanerpaat 100 akornanniiginnaavilluta.
- Normu 123tut inissippunga atorlugit 4.04,00 tiimit. Ajunngeqaaq, tulluussimaarutigaara. Maannakkut Arctic Circle Race'mut qilanaarpunga, Martin Møller oqarpoq, taanna siorna nummer 2-nngorpoq.