Siumup oqallitsitsineq iluarisimaarpaa
Siumut oqallitsitsinerata kingorna Aleqa Hammondip qularutiginngilaa partii iluatsitsilluartoq. Inuit 80-90 takkuttut Katuaq ilisimatitsivoq - Siumut isumaqarpoq peqataasut 200
- Innuttaasut oqariartuutaat paatsoorneqarsinnaanngilaq: Pisuussutivut akeqanngitsumik tunniussuunneqassanngillat.
Taama oqarpoq Siumup siulittaasua Aleqa Hammond ippassaq unnukkut Nuummi aatsitassat pillugit ataatsimiititsinerup kingorna
Imalu inerniliivoq:
- Naalakkersuisunit innuttaasut tusaaneqannginnerat ajorineqarpoq.
- Aatsitassaqarneq pillugu illuatungaannarsortumik paasititsiniaaneq akuerineqanngilaq.
- Innuttaasut oqartussaaqataannerat amigarineqarpoq.
- Naalakkersuisut kisermaassisutut pissusilersornerat akerlerineqarpoq.
- Aatsitassanik pisuussutitta akitsuutitaqanngitsumik annissorneqarnissaat akerlerineqarpoq.
Siumup siulittaasua naapertorlugu oqallinneq uummaarissumik ingerlavoq, oqaaseqarumasut 25-init ikinnerunngitsut oqaaseqarput.
- Politikerit oqaasissaat pingaarnerutinnagit kisiannili innuttaasut oqaasissai pingaarnerutillugit ataatsimiinnermik ingerlatsineq iluarisimaarneqarpoq.
- Nipangersarneqarneq, qunusaarineq aammalu sunniuteqartitsinaveersaarneq aqqutissaanngilaq, kisianni aqqutissaq tassaavoq innuttaassut isumaannik tusarnaarsinnaaneq immersorneqarsinnaanerlu – tassa aatsaat innuttaasut sinnerlugit sulineq, Aleqa Hammond oqarpoq.
Takkuttut amerlassusai ingasaatilaapai
Siumup siulittaasuata Sermitsiaq.AG ullumi isornartorsiorpaa, ullumi siusinnerusukkut allaaserigatsigu politikkerit, suliniaqatigiiffiit, tusagassiortut innuttaasullu Katuap inersuaraani ataatsimiititsinermut peqataasut 75'iuneraratsigit.
- Takkuttut 75'siinnaanngillat, 200 ataannagit aggerput, Aleqa Hammond naqissusiivoq.
Kisianni Katuaq cafémi aamma ataatsimiititsinernik aqutsisoq Evy Holding naapertorlugu Aleqa Hammond naatsorsuinerlunnerarneqarpoq.
- Issiaviit 80'it inaalissorpagut amerlanerpaamik inuit 90'it takkupput, Evy Holding ilisimatitsivoq.