Ilisimatusartut umiarsuassaat

Apriili aallartippat Pinngortitaleriffiup umiarsuassaa ilisimatusarnermut atorneqartussaq Nuummut tikissaaq

Pinngortitaleriffiup ilisimatusarnermut atatillugu umiarsuassaa nutaaq apriilip 14'ianni Nuummi nal. 14.00 Skonnertkajimi atserneqassaaq. Assi: Grønlands Naturinstitut

Ullualuit qaangiuppata Pinngortitaleriffiup ilisimatusartunut umiarsuaatissaa nutaaq Nuummut tikissaaq.

Umiarsuaq nutaaq 32 meterisut takissuseqartoq Pinngortitaleriffimmi aamma Silap Pissusianik Ilisimatusarfimmi ilisimatusartut qanimut suleqatigalugit OSK-Shiptechimit ilusilersorneqarsimavoq Skaginimilu Karstensens skibsværftimi sananeqarpoq.

Umiarsuaq siullertut pingaarnertullu Pinngortitaleriffimmi aalisakkanik, imarsiorlunilu misissuinerni atorneqartussaavoq. Taamaattumik misiliutinik katersinerni atortussaqarluartumik periarfissaqarluartumillu sanaajuvoq. Umiarsuaq uuliasiornerni aamma sinerissap qanittuini aatsitassarsiornerni misissuinernut atorneqartartussaalluni. Umiarsuaq 50 mio. koruunit missaannik akeqarpoq aammalu aalisarnermi, avatangiisini silamillu misissuinerni suliassanut assigiinngitsorpassuarnut aaqqissuussaavoq pisatsersugaallunilu.

- Immami pisuussutit (uumassusillit uumassuseqanngitsullu) maannakkut siunissamilu kalaallinut inuiaqatigiinnut pingaaruteqartorujussuusussaapput taamaattumillu umiarsuaq nutaaq pisuussutinik aqutsinermut aamma immami avatangiisinik isumannaarinissamut tunngaviusumik ilisimasanik pissarsiniarluni sulinerni nunatsinnut pingaaruteqartorujussuussaaq. Immami uuliamik ujaasinerit amerligaluttuinnartut, sinerissamut qanittumi aatsitassarsiornerit sunniutaat aamma umiarsuit takornariartaatit amerlinerisa kingunerisaanik umiarsuit angallattut amerligaluttuinnartut kiisalu sikusarani pissutsit allanngortut kingunerisaannik immami avatangiisit tatineqaleraluttuinnarput.

- Immap avatangiisaani suliassat amerlassusiat aamma nunatsinni upalungaarsimasariaqarnerit ukiuni aggersuni amerligaluttuinnarlutillu annertusigaluttuinnarnissaat naatsorsuutigineqarpoq taamaattumillu ilisimatusartunut umiarsuaq nutaaq siunissaq ungasinnerusoq eqqarsaatigalugu inuiaqatigiinnut aningaaliissutaannaanngilaq aammali politikki eqqarsaatigalugu avatangiisinut tunngatillugu ersarissumik oqariartuutaavoq, Pinngortitaleriffik tusagassiivinnut nalunaarpoq.

Nuummi apriilip ulluisa 14-ani angallatinut talittarfimmi nal. 14.00 pisortatigoortumik umiarsuarmik atsiisoqassaaq. Atsiinersiorneq tamanut ammajumaarpoq nal. 14.30 - 17.30.

Paasissutissat: Umiarsuup aallaaserinera

  • 32,30 meterisut takitigaaq, 4,8 meterinik itissuseqarluni, tonnage 458 GT
  • Motoria: Cummins K38-M Tier 2 (1000 HK)
  • Motoriata aappaa 2 Cummins QSM 11D (220 KW generator)
  • Sumiissusersiutit attaveqaatillu nutaaliaanerpaat pigai Avannarpasissumi angalanissaminut naleqqussagaalluni
  • Qalorsuarnut imusivimmut, ningittakkanut imminnut isumagisumik ningittartunut, qassutinik pullatinillu qaqitsissummut inissaqarluni.

  • Inunnut 16'inut inissaqarpoq (inuttat arfinillit aamma biologit qulit). Ineqqat qulingiluat taakkunannga arfineq-marlut quleriinnik siniffillit. Ineeqqat tamarmik uffarfeqarput, oqaraasuaateqarlutik aammalu qarasaasianut ikkuffeqarlutik internetterfiusinnaasunik.
  • Umiarsuaq titartarneqarpoq OSK-Shiptech sananeqarluni Skagenimi Karstensens skibsværft 2011/12
  • Akia 50 million koruunit miss.
Powered by Labrador CMS