Ilinniartitsisunik isumaqatigiissitsisussaq toqqarneqassaaq
Nalunaaqqutaq 10 kina ilinniartitsisut akerliunerannik isumaqatigiissitsiniartuussanersoq toqqarneqassaq
Nunatta eqqartuussisuunera Søren Søndergård Hansen ungasinngitsumi ilinniartitsisut taakkualu sulisitsisui peqatigalugit sulisussanik mattussineq qaangerniarlugu ataatsimiissinnaalissapput.
Ippassaq ilinniartitsisut kattuffianni Imak'imi siulersuisut ataatsimiipput aalajangerniarlugu nunatta eqqartuussisuunerata isumaqatigiissitsiniartussatut siunnersuutaa akuersaarsinnaaneritsik.
- Siulersuisut ataatsimiinneranni isumaqatigiippugut ullumi qulinut isumaqatigiissitsiniarnermik ataatsimiititaq naapinniarlugu isumaqatigiissitsiniaasussaq eqqartorumallugu, Imak'ip siulittaasua Sivso Dorph oqarpoq.
- Søren Søndergård Hansen akuerisinnaasavisiuk?
- Tassa taannarpiaq ataatsimiinnermi eqqartussavarput.
- Kisianni sulisitsisussi nunatta eqqartuussisuunera tikkuarpaat. Ilissi qisuariarnissarsi kisimi utaqqisaalerpoq?
- Nalunngilara aamma erniinnaq saqqummiutissavarput ajornartorsiutaanavianngilaq, Sivso Dorph oqarpoq.
Marsip aallaqqaataa aallarnerfigalugu ilinniartitsisut nuna tamakkerlugu atorfinitsitsinissamut mattussipput isumaqatigiinniarnerit unittoornikut pissutigalugit.
Sivso Dorph naapertorlugu mattussineq pissutigalugu atuarfinni paatsiveerunnersuaq pisinnaavoq. Maliina Abelsen, aningaasanut naalakkersuisoq oqarpoq, sulisitsisut isumaqatigiinniarnernik angusaqarniarlutik aallarteqqinnissaminnut piareersimasut, sulilerusuttunik mattussineq atorunnaarsikkumallugu.