Takornariartaassuit ingiaqatigeeqqusaanngitsut USA'mi tupigaat

Kalaallit Nunaanni umiarsuarsuit takornariartaatit ingiaqatigiillutik angalaqqusaannginnerat takornariartaatinik Miamimi ussarsaarisoqarnerani tupigusuutaavoq

Kalaallit Nunaanni takornariartaassuit ingiaqatigiillutik angalasinnaannginnerat Miamimi takornariartaassuarnik ussassaarisoqarnerani maluginiarneqarpoq. Assi: Søren Duran DuusMalik Milfeldt, Visit Greenland aamma Gorm Diernisse, Royal Arctic Logistics, Nuuk nunarsuarmi umiarsuarsuit takornariartaatinik Cruise Shipping Miami ussassaarisoqarnerani. Assi: Visit Greenland

Umiarsuarnik takornariartaatinik nunarsuarmi ussassaarinerit annersaanni Cruise Shipping Miami, marsip 13-ianit 15-ianut illoqarfissuarmi nunarsuarmi takornariat umiarsuarsuisa angerlarsimaffittut taaneqartarpoq.

Umiarsuaatillit arlallit Kalaallit Nunaata Savalimmiullu neqeroorutaannik ulloq siulleq misissuisut, imartatsinni angallannermi ingiaqatigiilluni angalasinnaanermik isuma atoqqusaannginnera nuannaarutigaat.

- Umiarsuaatillit uagut oqaloqatigisavut arlallit, Umiartornermik nakkutilliisoqarfiup ingiaqatigiilluni angalasoqarsinnaaneranik siunnersuutaat tusarsimavaat, taassumalu sumut killinnera apeqqutigineqartartut siullersaraat, Malik Milfeldt, Visit Greenlandimit oqarpoq nangillunilu:

- Nuannaarutigalugu oqaluttuussinnaavagut aalajaangiiserisartakkagut - kingullertut ineqarnermut, attaveqaqatigiinnermut aamma angallannermut naalakkersuisoq Jens B. Frederiksen, danskit ministeriannik pingaaruteqartumik oqaluuserisaqarsimasoq, maannalu kiisami Damnarkimit paasineqalerunartoq ingiaqatigiilluni angalatitsisinnaanerup ulorianartortarisinnaasaa; ingiaqatigiilluni Kalaallit Nunaannut ingerlasoqartalissagaluarpat umiarsuarsuit takornariartaatit nunatsinnik ornigukkusukkunnaarnissaat.

Gorm Diernisse, Nuummi Royal Arctic Logisticsimit umiarsualivinnik sullissisuuvoq taassuma suleqataatalu umiarsuarsuit takornariartaatit Kalaallit Nunaannut ukiut tamaasa tikittut ilaat sullittarpaat.

- Paasinartorujussuuvoq, siunissami Kalaallit Nunaannut umiarsuarsuarnik takornariarniat kissaatiginngikkaanni, taava Kalaallit Nunaat kaajallallugu ingiaqatigiittoqartarnissaa eqqunneqartariaqarpoq. Illuatungaatigut pissutsit tunngaviusut aallaavigalugit inuugaanni, suliassaqarfimmi massumani qisuariaaatit eqqarsaatigalugit eqqisseriarluni allanik inerniliussassanik nassaarniartoqarsinnaavoq, sillimaniarnerup annertusinissaanik aammalu uagut inuussutissarsiutitta aningaasarsiutigisinnaanera isumagineqarsinnaavoq, suliarpummi aningaasarpassuarnik isaatitsiffiusinnaavoq, Gorm Diernisse oqarpoq.

Kalaallit naammagisimaarinnipput
Visit Greenland aamma Royal Arctic Logistics, Royal Arctic Line'p ataani inissisimasoq, tamarmik naammagisimaarinnipput Kalaallit Nunaat Umiartornermik nakkutilliisoqarfiup ingiaqatigiilluni angalasarnissanut siunnersuutaanut oqaaseqaateqarput, taanna isummiussaq Miamimi aamma tusaaniarneqarpoq.

- Concordiap umiunera oqallinnernut annertuumik peqqutaaqataavoq maani Miamimi ataatsimeersuarnermi, kisianni aamma pingaaruteqartoq uagut isumaqarpugut sillimaniarnissaq pissutigalugu sukaterisoqarnissaa, maleruagassanik tupinnakuluttunik pilersitsigani, taakkua kingunerisaanik takornariartaassuit nunatta imartaani angalanissaannut akuersaanngilluinnarnermit, Malik Milfeldt oqarpoq.

- Sillimaniarneq umiarsuarnik saqqummersitsinermi ataatsimeersuarnermilu aamma ukioq manna eqqartorneqarput, suliassaqarfilli taanna asuliinnaq pisassaanngilaq. Italiami umiusoqarnera sioqqullugu sillimaniarneq siulliullugu isiginiarneqartarpoq, soorlu timmisartuni angallassinermi tamanna pingaartinneqaqisoq. Sillimaniarnerup annillisinnissaanik eqqarsaarneq iluanaarniarnissamik eqqarsarnermit pingaartinneqarneruvoq, Malik Milfeldt oqarpoq.

Powered by Labrador CMS