Inuit timaat toqungasut nannut assaallutik qaqinniarsarigaat
Nannut pingasut ippassaq Upernaviup iliveqarfiani ilerrit akornanni nerripput
Upernavimmi politiit ippassaq nalinginnaanngilluinnartumik pissutilinnit kalerrinneqarput. Nannut pingasut, anaanaq marlunnik piaralik, iliveqarfimmi ilerrit akornanni assaalersimapput.
Qujanartumik nannut iliveqarfimmi aseruivallaarsimanngillat. Nerisassarsiorlutik taamaallaat naasuusat uppikaatitersimavaat.
Nannulli iluatsitsisimapput. Qanittumi illut ilaata eqqaani puisimik aatsaat pisarineqaqqammersumik nassaarsimapput.
Puiseq ileqarfiliaateriarlugu ilerrit akornanni nerrisilersimapput. Politiit piniartunillu nakkutilliisoq iliveqarfimmut apuummata taarsuup ataani nannut qimaareersimapput.
Immaqa toquttariaqassapput
Nalunaarutit kingulliit naapertorlugit nannut maannakkut Upernaviup avannaani sikumiipput.
Ulluni kingullerni marlunni nannut taakkua pingasut illoqarfiup eqqaaniissimapput, inunnit nannut sumiinnerannik malinnaalluarsimasunit alutorineqaqalutik.
Upernavimmi nannuttassat tamakkerneqareersimapput. Nannulli illoqarfimmut uteqqikkaluarpata, piniartunik nakkutilliisup Niels Hansenip qularinngilaa qanoq iliussanerluni.
- Toquttariaqalersinnaavagut, taanna oqarpoq.
Upernavimmi iliveqarfimmi pisimasoq pillugu assiuteqaruit, qinnuigaatsigit uunga nassiuteqqullugit: louise@ag.gl