D: Danmarkimit tapiissutinik isumalluuteqannginnerussaagut

- Tamatta anguniartariaqarparput Danmarkimiik tapiissutinik isumalluuteqarunnaarnissarput.

Taam oqallissaarummi allappoq Demokraaatit siulittaasuat Jens B. Frederiksen.

- Taamaammat nammineq isertitsivissarsiortariaqarpugut minnerpaamik naalagaaffiup tapiissutaasa amerlaqataannik. Allatut oqaatigalugu suliffissuarnik pilersitsisariaqarpugut aningaasanik isaatitsivissanik. Matumani aatsitassarsiornerup iluani periarfissat iluanaaruteqarfiusinaasut atorluarniartariaqarpagut. Aamma taamaaliorutta aatsaat Namminersorluni Oqartussaaneq iluatsittussaavoq..

Jens B. Frederiksen naapertorlugu qularutissaanngilaq aatsitassatigut annertuunik periarffissaqartoq.

- Soqutiginnilluartoqarnera nuannaarutigissavarput qinnuteqartullu tutsuviginarpata taava akuersissummik tunineqartariaqarput, aatsitassarsiorneq aallartilluarneqarniassammat. AAatsitassanik pisortaqarfiup 2012-miinnaq naatsorsuutigaa aatsitassanik qaqutigoortunik , zinkimik, savimissamik aamma rubininik piaanissamut qinnuteqartoqarumaartoq.

- Nunatsinni silap pissusaa, attaveqarneq, inuiaqatigiit amerlassusaat aamma najugaqariaaserput pissutaallutik aatsitassarsiorneq imaannaanngitsuusussaavoq. Tamakku pissutaallutik ingerlatseqatigiiffiit nunanit allaneersut sanaartornernut ingerlatsinernullu nunani allani misiginikuunngisaminnik aningaasartuuteqangaatsiartartussaapput, Jens B. Frederiksen oqarpoq.

Kalaallit Nunaat soqutiginartuusariaqarpoq
- Taamaattumik inuiaqatigiittut tamakku aggersarniarlugit atugassaat kajuminnartuutittariaqarpagut taamaakkarluarpalluunniilli soorunami pisuussutigut tunniussuutiinnassanngilagut aamma avatangiisinut piumasaqaatigut sakkortuut pilliutigissanngilagut. Mianersuutassarpassuaqarpugut – tamannalu eqqumaffigilluarparput. Eqqaamassavarpulli aatsitassarsisorfiit qunoriartissagaluarutsigit, suliffinnik ataavartunik pilersitsinavianngilagut, ineriartortitsinavianngilagut aamma karsimut aningaasat amerlanerit isaalernavianngillat.

- Demokraatini tamanna tunngavigalugut Siumut isumaqatiginngilluinnarparput, taakkumi tusagassiutinut nalunaarumminni oqarput, partiip ineriartorneq aallartinniamisaalersoq unitsinniaraa.

- Siumup aatsitassanut isumaata tukannera unittariaqarpoq, partii periarfissatsinnik aserorterilersinnagu. Qaammatit arlalialunnguit matuma siorna Siumup aatsitassarsiorniartut milliuuninik untritilikkaanik akiliisinniarsarinialeraluarpai. Maannakkullu taakkorpiaat nunatsinni ingerlatseqatigiiffiliorniartut isaatitsiniarnertinnilu ikorfartuiniartut aamma piiaanissaminnut akuersissummik partiip tuneqqujunnaalerpai..

Aallartittariaqarpugut
- Taggiinerit tamarmik takutippaat ukiorpassuarni tulliuttuni minnerpaamik ukiumut 1 milliard koruunit amingaatigisartussanngulerigut, ullumikkutut tungiuineq ingerlaannassappat. Aningaasallu taakku aatsaat isertissinnaavagut aallartitsiortornikkut suliffinnillu ataavartunik pilersitsiortornikkut.

Piffissaanngilaq noqinnissamut – aallarteriarnissamulli piffissanngorpoq, Demokraatit siulittaasuat oqarpoq.