Nunarput tamakkerlugu suli issittuarsinnarpoq tamatumalu kingunerisaanik Royal Arctic Linep umiarsuaatai assut kinguaattoorput ilaalu uniinnartariaqarlutik, umiarsuaatileqatigiiffik ilisimatitsivoq, ataasinngornermi ualikkut pissutsinik ilisimatitsillutik. 

Kujataani: Sakkutuut imarsiortut nakkutilliissutaat Hvidbjørnen ikiortigalugu sapaatit akunneranni kingullermi Narsarsualiartoqarpoq, kiisalu sapaatit akunnerata tulliani Hvidbjørnen Igalikup tungaanut siku aserorterlugu aqqutiliussaaq.

Ajoraluartumik Qassiarsummut angalasoqarsinnaanngilaq. Tamatuma saniatigut Kujataani nunaqarfinnut allanut angalanissat uniinnarnissaat naatsorsuutigineqanngilaq. 

Nunaat qeqqa: Nunaqarfiit Nuummiit avannamut suli sikuupput tikinneqarsinnaanatik sapaatillu akunneranni aggersumi tamatuma allanngornissaa naatsorsuutigineqanngilaq.

Sakkutuut imarsiortut nakkutilliissutaata Knud Rasmussenip sapaatit akunneranni aggersumi Arina Arctica ingiaqatigissavaa sikumik aserorterullugu Sisimiunut aamma Maniitsumik tikissinnaaniassammat.

Qeqertarsuup Tunua: Sapaatit akunnerannut kingullermut naleqqiussilluni sikuunera annertusivoq maannakkullu Aningamiit Vaigat tikillugu imaq tamangajammi ukiup sikuanik sikuuvoq.

Naatsorsuutigineqanngilaq Aasiannut, Qasigiannguanut imaluunniit Ilulissanut sapaatit akunneranni aggersumi umiarsuarmik tikittoqarnissaa.

Sikuunera pissutigalugu iloqarfiit tikinneqarsinnaanngillat uku: Aasiaat, Qasigiannguit, Ilulissat.

Sikuunera pissutigalugu nunaqarfiit tikinneqarsinnaanngillat uku: Qassiarsuk, Napasoq, Atammik, Kangaamiut, Qeqertarsuatsiaat, Kapisillit, Itilleq, Sarfannguit