Arsartut finalinut pingasunut anngupput

Arctic Winter Games, AWG Canadami ingerlanneqartoq naggataariartuaaq. Tallimanngornermi arsarnermi semifinalit ingerlanneqarmata Kalaallit Nunaannit tamarmik ajugaaffigineqarput, taamaalillunilu Nunarput finalinut tamaginnut ilaasussanngorluni. Arsaqatigiit finalertussat tassaapput niviarsiaqqat aamma nukappiaqqat nukarliit angajulliillu.

Niviarsiaqqat NWT'mut unamminerminni ajornartorsioraluarput. Naak arsarluaraluaqalutik isertitsinissaminnik ajornartorsiuteqarput. Ilami 0-1-imi kinguaraluarput. Isertitsereerlutik aamma namminneq måliminnut isertitsigaluarlutik. Sivisuumik ajorsartussatut isikkoqarput, minutsilli kingullerpiaat atorlugit unamminertik aaqqippaat målit pisariaqartitatik isertillugit. 4-2'mik ajugaapput arfininngornermi Yukonimut finalertussanngorlutik.

Nukappiaqqat nukarliit NWT'mut ajugaallualaavipput. 7-3-mik ajugaagamik. Finalimi Alberta North naapissavaat. Nukappiaqqani angajulliit semifinalimi Yukon naapippaat naligeeqalutik. Taamaattorli 4-3-mik ajugaapput finalimi Yamal naapissallugit.

Arfininngornerup ingerlanerani ujammit amerlaqisut inuttassarsissapput. Badmintonimi pissartanngorniuunnerit naammassineqassapput. Ujammit amerlasuut kalaallinit pissarsiarineqarnissaat naatsorsuutaavoq. Kuultit, silvit bronzellu.