Nuimasut Ilulissanut piareerput
Naalakkersuisut sapaatip akunnerata tulliani Ilulissani kommunit pillugit isumasioqatigiisitsissapput, ilaatigut Islandimi Savalimmiunilu nunami namminermi naalakkersuisut peqataassallutik
Nunamut Namminermut, Pinngortitamut Avatangiisinullu Naalakkersuisoq Anthon Frederiksen ulluni 12. martsimiit 15. martsimut kommunit pillugit Ilulissani isumasioqatigiinnissamut Naalakkersuisut sinnerlugit aggersaavoq.
Kommunini borgmesterit aningaasaqarnermullu ataatsimiititaliat, kommunaldirektørit aningaasaqarnermullu pisortat, Kanukokap siulersuisui aammalu Kanunupe peqataassapput.
Kommunit pillugit isumasioqatigiinnermi oqaluuserisassani immikkoortut ilaatigut makkuninnga imaqarput: Najukkami tamat oqartussaaqataanerat, 2025-p tungaanut atugarissaarnissamik aningaasaqarnikkullu attassisinnaanissamik isumannaarineq, inuussutissarsiornermut suliffeqarnermullu tunngasuni ineriartortitsinermut tunngasut, siunissami isertitatigut periarfissat kiisalu atugarissaarnermik ineriartortitsineq eqqarsaatigalugu ataatsimut unammilligassat.
Aammattaaq Savalimmiuni Islandimilu nunamut namminermut naalakkersuisut ilanngussinissaat, aamma borgmesterit, Kanukokap aammalu Kanunupep siulittaasuisa tamarmik immikkut ilanngussinissaat pilersaarutinut ilanngunneqarput. Danmarkimi aningaasaqarnermut ministeriaqarfimmit aallartitap Danmarkimi missingersuutinut inatsisissaq saqqummiutissavaa.
Peqataasussat katillugit 80-it missaanniinnissaat naatsorsuutigineqarpoq, taama nalunaarput namminersorlutik oqartussat.