RAL-ip Nanu Børn ikiorpai
Royal Arctic Line A/S Nanu Børnip ikiugaanut meeqqanut inuusuttunullu annertuumik aningaasaliivoq
Februaarimiit Royal Arctic Line Nanu Børninik aningaasaliisuunissamik isumaqatigiissuteqarpoq sinerissami Nuummilu Nanu Børnip ornittagaannut assartuilluni kiisalu nunatta Aalborgillu akornanni.
- Royal Arctic Linep siusinnerusukkut arlaleriarluni ikiortarsimavaatigut, Nanu Børnini siulittaasoq Krissie Berthelsen Winberg nuannaarluni oqarpoq.
- Maannakkulli isumaqatigiissusiornitsigut suliniutivut pilersaarusiorluarsinnaanerulerpugut, oqarpoq.
Aningaasaliisuunissamik isumaqatigiissut ukiuni pingasuni atuutissaaq, peqatigiiffimmullu pingaaruteqaqaluni nunatta sinneranut ukiumut annertuumik nassiussugassaqartilluni, annermik atisanik.
- Royal Arctic Linep ikiorniarluta aalajangiinera uagitsinnut pingaarluartuuvoq aningaasammi sipaarneqartut tamarmik inuuttunut atorneqartussaapput, taakkumi pineqarmata, Krissie Berthelsen Winberg nassuiaavoq.
- Royal Arctic Line annertuumik qutsavigaarput, aammali aningaasaliisorpassuagut tamaasa qutsavigaavut, taakkoqanngippammi annertunerusumik ikiuisinnaassanngikkaluarpugut.