Skip to main content

RAL-ip ukiumut naatsorsuutit naammagisimaarpai

Royal Arctic Linep 2011-mut ukiumut naatsorsuutaanni akileraareerluni 73 million koruuninik sinneqartoorpoq, ukiorli manna taamatut ingerlasoqaannarnissaa umiarsuaatileqatigiit ilimaginngilaat  

- Nunatta umiarsuaatileqatigiiffiata 2011 unammillernarlunilu pissanganartoq anigorluarpaa.

 

Siulersuisut naatsorsuutit, akileraaruteqareernikkut 73 millionit koruuninik sinneqartooruteqarfiusut, akuersissutigeqqammerpaat.

Royal Arctic Linep 2011 tamakkerlugu anguniagarisimavaa piffissamut ungasinnerusumut aningaasaliissuteqarnissat, soorlu umiarsuarnik nutaanik sanatitsinissaq aamma Nunatsinni umiarsualivinnik allisitsinissaq.

- Aalajangernerit attaveqaasersuutinik, inuuniarnermut pingaaruteqaqisunik, qulakkeerinnittussaasut. Tamatumunnga ilutigitillugu aalajangiinerit ukiuni aggersuni annertuumik aningaasaliissuteqarnissamik pisariaqartitsisussat, tamatumalu kingunerisaanik ingerlatsiviup aningaasaqarniarneranik tatisisussat.

- Siulersuisuni nuannaarutigaarput 2011-mi naatsorsuutitigut angusat patajaalluinnartut saqqummiussinnaagatsigit. Tamatuma qularnanngilluinnartumik ingerlatsivik patajaallitissavaa, kingunerisaanillu aningaasaliissutissanik annertuunik siunitsinni utaqqisunik naammassinnissinnaanera annertusarlugu, siulersuisut siulittaasuat Martha Labansen oqarpoq.

Angusat

Suliffeqarfissuup Royal Arctic Linep 2011-ni naatsorsuutitigut angusarai, akileraarutit suli akilernagit, 109 millionit koruunit kiisalu akileraarutit akilereerlugit 73 millionit koruunit, 2010-mut sanilliussilluni akileraarutit suli akilernagit 41 millionit koruunit akileraaruteqareernikkullu 29 millionit koruunit

- Suliffeqarfissuup naatsorsuutitigut angusarisaata ineriartornera pissutsinik assigiinngitsunik patsiseqarpoq, kisianni pingaarnerpaajuvoq Nuummi sanaartornermi annertunerusumik ingerlatsineq aamma uuliasiornermik ingerlatsinerup umiarsualivinni arlalinni annertunerusumik suliaqartitsinera. Ingerlatsiviup qitiutitaa tassaasoq aningaasartuutit tamatigut ingerlatsinermut naleqqussarneqarnissaat, aamma 2011-mi immikkut ittuusumik umiarsuarnut nalikilliliinernut aningaasartuutit malunnaateqarluartumik annikillisimanerat pitsaasumik ineriartornermut tunngaviupput, Martha Labansen nassuiaavoq.

Naatsorsuutigisat
2011-mi usit Nunatsinnut assartorneqartut annertussusiat Nuummi sanaartornermik pitsaasumik sunniuteqarfigineqarput, aamma umiarsualivinni arlalinni kaaviiaartitat uuliasiornermik pitsaasumik sunnerneqarlutik.

Royal Arctic Linemit naatsorsuutigineqanngilaq 2012 ingerlatsinerup taamatut annertutiginissaa, taamaattumik Royal Arctic Linemit naatsorsuutigineqarpoq Nunatsinnut assartukkat appariarnissaat 2010-mut sanilliussilluni annertutigissallutik.

-  Umiarsuarnik nutaanik nalikilliliineq 2012-mi aallartittussaavoq, kiisalu usit assartorneqartut annikillinissaannik aamma uuliasiornerup annikillinissaanik naatsorsuutigisaqarneq tunngavigalugit ukiuni tulliuttuni aningaasatigut angusat ikinnerussapput, Martha Labansen oqarpoq nangillunilu:

-  Kisianni tamatuma allanngortinngilaa 2011-mi naatsorsuutitigut pitsaasumik angusaqarnitsinnut nuannaarutiginninnerput, uangalu qularutiginngilara siunissamut pilersaarut pitsaasuusoq pissutigalugu aamma sulisut pimoorussillutik sulilluartut pissutaallutik Royal Arctic Line unammilligassanut aggersunut piareersimalluartoq.

Ilanngussami atuarsinnaavatit RAL-ip ukiunut tallimanut kisitsisaataat.  

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER