Alcoa London Miningilu akerliussutsimik takutitsiffigineqarput
-Alcoamut Nuullu Kangerluani London Mining Greenland A/S-imut qujaannarpugut, taamatut oqarput Nuup Kangerluata Ikinngutai ippassaq namminersorlutik oqartussat saavanni akerliussutsimik takutitsigamik
Ippassaq Nuummi Alcoamut aamma London Mining Greenlandimut akerliussutsimik takutitsinrmi inuit 60 angullugit amerlassusillit peqataapput.
Peqatigiiffiup pilersinneqaqqammersup Nuup Kangerluata Ikinngutai-sa Nuup Kangerluani (Kangersunermi) aatsitassanik piiaaffissaq akerleraa.
London Mining kangerlummi atortunik arlalinnik pilersitsinissamut qinnuteqareerpoq, pisariaqartumik avatangiisitigut geotekniskimillu misissugassat misissorniarlugit. Tamanna pissaaq tamaani saviminermik piiaaffimmik pilersitsisoqannginnerani.
Tusarniaanermut killissarititaavoq ullumi pingasunngorneq. Naatsorsuutigineqareerporlu naalakkersuisut suliniummut akuersissasut.
Naalakkersuisullu akuersissuteqassappata London Miningip sanalissavai aqquserngit, ikaartarfik 110 meterinik takissusilik Qussummilu sulisartut inissaat. Peqatigiiffillu Nuup Kangerluata Ikinngutai isumaqarpoq tamanna pinngortitamik aserorsaataassasoq.
- VVM ingerlanneqarsimavoq, tassa avatangiisinut sunniutissat nalilerneqarnerat, misissuinerulli tamassuma inerneri suliluunniit tamanut saqqummiunneqanngillat, peqatigiiffimmik pilersitsisoq ippassarlu akerliussutsimik takutitsisoq Pîtánguaq Tittussen oqarpoq.
Paasissutissat annikitsut
Taanna isumaqarpoq London Miningip Kangersunermi pilersaarutiminut paasissutissiissutai amigarpallaarlutillu naammanngippallaarsimasut.
Inuussutissarsiornermut aatsitassanullu naalakkersuisoq Ove Karl Berthelsen qanittukkut oqarpoq London Mining siunertalinnik suliniuteqarsinnaassaguni, tamatumani ilanngullugu aningaasatigut, avatangiisinut isumannaatsuunermullu tunngasunut suliniutit, atortut maanna tusarniaavigineqartut ikkussornissaat pisariaqassasoq.
Nuup Kangerluata Ikinngutai marsip ingerlanerani pilersitsissutaasumik ataatsimeersuassaaq.