Whitehorse'mut apuulluarput
Kalaallit timersortartui Whitehorsemut apuupput sapaatip akunnerata tulliani Arctic Winter Games'imi unammiuaarnerit arlallit peqataaffigissallugit
Kalaallit Arctic Winter Games'inut, AWG, aallartitaat timersortartorpassuillu ulluni marlussunni tikitaminnut sungiussiniaaqqaarallassapput. Kangerlussuarmi 44'nik issittoq qimallugu Canadami Whitehorsemut marluinnarnik issittumut angalaneq ingerlalluarpoq.
Timmisartornissaq nalunaaqqutap akunneri arfinillit ingerlaffiusussatut naatsorsuutigineqarpoq timmisartortartorli allatut perusussimagami nal. ak. tallimat qaangiutiinnartut apuupput. Kalaallit Nunaata Whitehorsellu nalunaqqutaat akunnernik tallimanik nikingapput. - Taamaattumik inuusuttuaqqanut pissangasunut ulloq takeqaaq. Seqinnerpoq qatsungaqaluni unammiartortut inissiffissaminnut pivitsigatik illoqarfimmi nalunaqqutap akunneri marlussuit angalaarujooqaarput.
Arfininngorneq ulloq naallugu timersoriat freerujoorput taamaattorli sungiusassapput pissutsillu assigiinngitsut ilinniarlugit. Sapaammi nal. 14. (nunatsinni nal. 19) timersortartut unammisussat siulliit aallartissapput. Nukappiaqqat nukarliit unammissagamik. Sapaammi kingusinnerusukkut - tassa nal. 18 - unammersuarneq pisortatigoortumik ammaanersiorneqassaaq Canada Games Centre'mi.