Akulerunnikkut ilinniartitsisut mattussinerat unitsinneqarsinnaavoq
Ilinniartitsisut mattussinerannik unitsitsissutaasinnaasumik politikerit sakkortunerpaamik sakkussaqarput Politikkikkut akulerussinnaapput. Apeqqutaavoq tamanna qaqugu pissanersoq?
Ilinniartitsisut peqatigiiffiata ilinniartitsisunik atorfinitsitsinermik mattussinerat politikkikkut akulerunnikkut imaasiallaannaq unitsinneqarsinnaavoq. Apeqqutaavoq politikerit tamanna periarfissatut isigineraat?
Aningaasaqarnermut naalakkersuisup Maliina Abelsenip apeqqut taannarpiaq periataallaqqilluni akinngilaa, ullaap tungaani mattussineq, ipassaq atuutilersoq, pillugu tusagassiortunik katersortitsisoqarmat.
- Neriuppugut politikkikkut akulerunnissaq pisariaqassanngitoq, taanna akivoq.
- Tunuartissinnaavisiulli piffissap ilaani akulerutissasusi pinngitsaaliissummillu mattussineq unitsillugu?
- Pissutsit taamaatsillugit sumilluunniit tunuartitsisinnaanngilagut.
Politikerit nalinginnaasumik aatsaat akuleruttarput pineqaraangata "inuiaqatigiinni soqutigisat pingaarutillit". Apeqquterujussuaq tassaavoq qaqugukkut taamaattoqartoq politikerit naliliissasut? Assersuutigalugu tullianik atualerneq aallartippat, Imak malillugu klassini ilinniartitsisunik 100-nik amigaateqartoqassasoq?
- Qanorluunniit pisoqaraluarmat neriuppugut pissutsit aaqqinneqassasut tamaanga killitsinnata, Maliina Abelsen oqarpoq tikkuarlugulu Namminersorlutik Oqartussat isumaqatigiissitsiniartumik tikkuaanerat ilinniartitsisut peqatigiiffiannik Imak-mik eqqissisimasumik aaqqiissuteqartitsiniarnerusoq.
Atuaruk "Namminersorlutik Oqartussat: Manna pissutigalugu aaqqiagiinngittoqarpoq"
Atuaruk "Isumaqatigiissitsiniartartup aaqqiagiinnginneq qaangertissavaa"
Isumaqatigiissitsiniartartumik qaaqqisisoqarnera "pisuusaarnerinnaviusoq" Imak-ip oqarnera tunuartippaa. Taassuma erseqqissarpaa sulisitsisut Imak-mik pimoorullugu isumaqatigiinniarnissaminnut piareersimasut.
- Kissaatiginerpaavarput aaqqiagiinnginnerup qaangerneqarnissaa. Atuartunik eqquissanngilaq. Politikkikkut sunnguamilluunniit pisuussuteqanngilagut matuma mattussinermik kinguneqarneranut. Uggornartorujussuartut isigaarput Imak-ip aaqqiagiinnginneq taamaasiornermigut annertusarmagu, Maliina Abelsen oqarpoq.
Imak-ip illua'tungisalu, namminersorlutik oqartussat kommunillu, aaqqiagiinnginnerat aallaaveqarpoq akissarsianik isumaqatigiinniarnerit ajalusoornerannik. Sulisitsisut piumasaraat ilinniartitsisut piffiup suliffiup ilaa annertunerusoq atuartitsinermut atortassagaat. Imak tikkuaavoq ilinniartitsisut sulinermik 40 procentia atuartitsinermut atortareeraat, sulisitsisullu saqqummiussaat kinguneqassasoq ilinniartitsisut akissarsiaaasa appariangaatsiarnerannik, pissutigalugu qaangiuttoornersiaqartarunnaassagamik.
Atuaruk "Ilinniartitsisunngorniat: Oqallinneq mumitissimavarput"
- Meeqqat atuarfiannit soraarummeertut 2/3-lii ilinniagaqarnermut ingerlaqqinnissamut piareersimanngillat.Tamanna ilinniartitsisut pisuussutiginngilaat. Ilinniartitsisut annertuumik pingaarutilimmilu sulipput. Pingaaruteqarporli atugassanik pilersitsissasugut taamaasilluni ilinniartitsisut pikkorinnerpaaffimminnik suliaqarlutik: Annertunerusumik atuartitsineq! Taamaasilluni aamma atuartut faginut pikkorissusiat nukittorsassavarput. Ilanngullugu kukkuneruvoq oqassallujni ilinniartitsisut akissarsiaat appariassasut. Ilinniartitsisut tunngaviusumik akissarsiaat ajorseriassanngillat, qularnanngilarli ilaat qaangiuttoornersiaminnik annaasaqassasut. Taamaattariaqarpoq. Naatsorsuutigineqarsinnaanngilaq qaqugorsuarmut qaangiuttoornersiaqartarnissaq, Maliina Abelsen erseqqissaavoq.