Kalaallit Danmarkimi parnaarussivimmiiginnassapput
"Kanngunaqaaq eqqortuusinnaananilu" Kalaallit Nunaanni inissiisarfik nutaaq aatsaat 2017-imi naammassissammat, Enhedslisten appisaluussivoq
Naak kalaallit 18-it Herstedvesteri inissiisarfimmi parnaarussaasut sakkortuunik pinerluuteqarsimalluarlutik pineqaatissinneqarsimagaluartut, ukiorpassuarni Danmarkimi eqqartuussiveqarnikkut kanngunartuliatut taaneqarsinnaavoq nunaminni ilaquttatik ikinngutitillu qanillugit pillaatisiaminnik ingerlatsisinnaannginnerat.
Arlaleriarlunili neriorsuutigineqartarsimagaluartoq Kalaallit Nunaanni matoqqasumik inissiisarfiliornissaq sukkanerpaamik sananeqassasoq, suli ukiut marlussunnik sivisunerusumik utaqqisoqartariaqassaaq "kanngunartup" atorunnaarnissaanut.
Inatsisinik atortitsinermut ministereqarfiup nunatsinnilu naalakkersuisut akornanni allakkat takutippaat suliaq utaqqinneqarallartoq ilaatigut aningaasaqarnikkut Danmarkip Kalaallillu Nunaata aaqqiagiinnginnerat peqqutigalugu, pineqarluni kikkut nunniunnermik akiliissanersut.
Taamaattumik Pinerluttunik Isumaginnittut nalilerpaat taanna aatsaat 2017-imi naammassisinnaassasoq. Tassalu ilimagisamiit ukiunik marlunnik kingusinenrusukkut aallaqqaammullu naammassinissaa pillugu siulittuinermit ukiunik sisamanik kingusinnerusukkut.
2010-mi aningaasanut inatsimmi suliamut 350 million koruuningajaat aningaasaliissutaapput, tamanikkut inatsisinik atortitsinermut ministerip Lene Espersenip K, naammassiffissaa 2014-miut imaluunniit 2015-imut ukiulermagu.
Enhedslistenimi oqaaseqartartup Pernille Skipperip inatsisinut atortitsinermut ministeri Morten Bødskov, S, suliami tuavisaarpaa.
Læs "Anstalten har spillet fallit"
Kanngunarpoq eqqortuusinnaananilu
- Akuerineqarsinnaanngilluinnarpoq kalaallit ukua pitsaanerusunik atugaqarnissaat ukiorpassuarni utaqqisariaqaratsigu, uanilu aalajangiisuulluni kina nunniornermut akiliissanersoq. Tamanna kanngunaqaaq akuerineqarsinnaananilu, Pernille Skipper Politikenimut oqarpoq.
- Qallunaaq nunani allani pineqaatissinneqaraangat ilungersorluta angerlartinniartarparput, akuerigatsigut parnaarussivimmiissagaanni ilaquttanik pulaarneqartarneq pitsaasuusoq.
Nunatsinni matoqqasumik inissiisarfiliornissaq 2007-mi Lene Espersenimit aalajangerneqarpoq, taannalu oqarluni 2012/2013-mi naammassissasoq. Tamannalu pivoq Eqqartuussiveqarnermut ataatsimiititaliarsuaq 1994-miit 2003-mut sulisimasoq ilaatigut taamatut siunnersuuteqarmat.