Mittarfiit pillugit ilisimasaqarluarusuppoq
IA-miit Aqqaluaq B. Egede naalakkersuisunut nunatsinni mittarfiit pillugit apeqqutissarpassuaqarpoq
Apeqqutit 17-iupput.
Inuit Ataqatigiit sinnerlugit Inatsisartunut ilaasortap Aqqaluaq B. Egedep § 37 naapertorlugu naalakkersuisunut apeqquteqaatai taama amerlatigipput.
Apeqqutit tamarmik nunatsinni mittarfinnut tunngassuteqarput, Aqqaluaq B. Egedemi isumaqarpoq pisariaqarluinnartoq "suliassat annertuut tamakkiisumik qulaajarneqartassasut, taamaalilluni tusatsiakkat pinnagit piviusulli tunngavigalugit oqallittoqarsinnaalluni".
Apeqqutai makkuupput:
- Assartuussineq pillugu isumalioqatigiissitap isumaliutissiissummini inerniliineri inassuteqaataalu Inatsisartuni oqallisigineqareernerisa kingorna Naalakkersuisut suliamik qanoq ingerlatitseqqippat?
- Naalakkersuisut nunatsinni mittarfeqarfiit pillugit namminersortunngorsaaniarnerat qanoq ilusilimmik ingerlanneqarpa?
- Mittarfiit imaluunniit mittarfik ataaseq sanaartorneqassappata, aningaasaliissutissat qanoq takorloorneqarpat?
- Mittarfiliortoqassappat Mittarfeqarfiit aningaasaliisussatut takorloorneqarpat? Imaluunniit nunatta karsianit toqqaannartumik aningaasaliinissaq takorloorneqarpa?
- Mittarfiliortoqassappat Mittarfeqarfiillu aningaasartuutinik matussusiisussatut takorloorneqarsimassappata, nunatsinni inuit angallannerannut akit atuuttut qanoq sunnerneqassanersut misissorneqarsimappat?
- Nunatta kujasinnerusortaani Qaqortumi mittarfiliortoqassappat Kommuni Kujallermi inuit sulinermik inuussutissarsiuteqartut amerlassusaat qanoq sunnerneqassanersoq misissorneqarsimava?
- Qaqortumi mittarfiliortoqassappat mittarfissap sumi inissisimaffissaannik isumalioqatigiissitap innersuussutigisaanni sorleq toqqarneqarpa? Imaluunniit periarfissanik allanik misissuisoqarsimappat sumi mittarfiliortoqarnissaa pissanersoq Naalakkersuisunit ilisimaneqarpa?
- Qaqortumi mittarfiliortoqassappat mittarfiup atuutilerneraniit aningaasat sipaarutissatut oqaatigineqartut qanoq sutigullu sipaarutaanissaat Naalakkersuisut takussutissaqartippaat?
- Nuummi Qaqortumilu mittarfinnik sanaartorfissatut takorloorneqartut eqqarsaatigalugit sumiiffinni pineqartuni silap pissusaannik misissuinerit pisortatigoortut Naalakkersuisunit Inatsisartunut saqqummiunneqarsinnaappat?
- Nunatsinni mittarfiit matuneqartussatut inassutigineqartut piviusunngortinniarneqassappata, inuiaqatigiit aningaasarsiornerannut aningaasarsiornerannut qanoq sunniuteqartussaanerat Naalakkersuisunit misissorneqarsimava?
- Sutigut Mittarfeqarfinni akilersinnaanerusumik ingerlatsineq pilersinniarneqarpa?
- Kangerlussuarmi mittarfik matullugu Nuummi mittarfiliortoqassappat sulinermik inuussutissarsiuteqartut qanoq amerlatigisunik ikileriassangatinneqarpat?
- Qeeqata Kommuniani sulisut amerlassusaat qanoq sunnerneqassava? Nuummi sulisut amerlassusaat qanoq sunnerneqassava?
- Assartuussineq pillugu isumalioqatigiissitap inerniliinermini ersersippaa mittarfiit pioreersut ilai atorunnaarlugit, nutaanik mittarfiliornikkut inuiaqatigiit aningaasaqarniarnerannut annertuumik sipaaruteqartoqassasoq. Aningaasartuutitigut inuiaqatigiit mittarfeqarfiillu sipaarutissaat ersarissumik takussutissiorneqarnissaat Naalakkersuisut apeqqutinnut akissuteqaamminni ilanngussinnaavaat?
- Mittarfinnik imaluunniit mittarfik ataaseq sanaartorneqassappat, sanaartortussanik isumaqatigiissuteqartoqareerpa?
- Taamaanngippat sanaartortitsinissami qanoq takorluuisoqarpa?
- Qaqortumi Nuummilu mittarfiliortoqassappat Kalaallit Nunaanni mittarfeqarfinni sulisut tamakkiisumik isigalugit qanoq amerlatigisunik ikileriassappat?
Aqqaluaq B. Egedep apeqquteqarnerminut ilaatigut tunngavilersuutigai:
- Nunatsinni aningaasarsiornikkut ineriartortitsiniarnitsinni sanaartugassat annertuut paasissutissanik piviusunik tunngavilinnik tamakkiisunik pigisaqarluni isummersorfigineqarnissaat pingaarutilittut isigaara.
- Apeqquteqaat Naalakkersuisunut ingerlatippara Inatsisartuni ilaasortatut apeqqutit akissutissarsisimanngisakka akissutissarsiumallugit.
- Paasinarsereerpoq Naalakkersuisut siunniutivissimagaat assartuussinermi atortulersuutit eqqarsaatigalugit nutarterinissaq siunniussimagaat. Siunniussaqarneq naqissuserneqar-simappat inuiaqatigiinnut siunertap tunngavilersuutissartai ersarissumik oqaatigineqarsinnaanissaat pingaartutut isigaara, Aqqaluaq B. Egede oqarpoq.
- Kissaatiginarpoq mittarfinnik nutaanik sanaartortoqassappat, aningaasarpassuarnik naleqassammat, Naalakkersuisut mittarfiliortoqarnissaannik siunnerfeqarunik aningaasartuutissat qanoq matussuserneqarnissaannik tikkuussisinnaassasut.