Avataasiorlutik raajarniat isertitaat

Avataasiorluni raajarniarnermi qanoq kaaviiaartitsisoqartigisarnera oqaatigiuminaappoq, Maliina Abelsen oqarpoq

Assi: Leiff Josefsen

Aningaasaqarnermut naalakkersuisoq Maliina Abelsen avataasiorluni raajarniarnermut tunngatillugu Siumut Inatsisartunut ilaasortaatitaata Akitsinnguaq Olsenip apeqquteqaataanut akissutissaqalerpoq. Aaku apeqqut aamma akissut:

- Ingerlatseqatigiiffiit avataasiorlutik rajaarniarnermik ingerlatsisut 2010-mi qanoq annertutigisumik katillugit isertitaqarpat?

- Naatsorsuutit massakkut saqqummiunneqartartut naapertorlugit ingerlatseqatigiiffiit avataasiorlutik raajarniarnermik ingerlataqartut qanoq kaaviaartitsisarnersut naatsorsorneqarsinnaanngilaq, soorlu assersuutigalugu Royal Greenland A/S-ip kilisaataatimi kaaviaartitai immikkut naatsorsorneq ajorpai, suliffeqarfissuulli tamakkiisumik kaaviiaartitaanut ilanngunneqartarlutik, soorluttaaq ingerlatseqatigiiffiit ataasiaakkaat kaaviiaartitatik kisitsisinngorlugit ilisimatitsissutigineq ajoraat.

- Ingerlatseqatigiiffiit taakku marluusut minillugit 2010-mi kaaviiaartitat tamakkerlutik 612 mio. kr. missaaniipput, ileqqorissaarnissarli eqqarsaatigalugu oqaatigineqassalluni kisitsisini taakkunani ingerlatseqatigiiffimmi pineqartumi ingerlatat allat ilaaratarsinnaammata, taamaakkaluartorli kaaviiaartitat ilamininngui kisimik tamakkunaneersuussangatinneqarput.

- Ingerlatseqatigiiffiit avataasiorlutik raajarniarnermik ingerlatsisut 2010-mi qanoq amerlatigisunik selskabsskat-imut akiliuteqarpat?

- Ingerlatseqatigiiffiit akileraarutitigut akitsuutitigullu akiliutigisartagaat assigiinngitsumik katitigaapput, taakkununnga ilaalluni ingerlatseqatigiiffiit akileraarutigisartagaat. Ukiumi aningaasarsiorfiusumi 2010-mi ingerlateqatigiiffiit tapit ilanngullugit kr. 6.955.000-inik ingerlatseqatigiiffiit akileraarutaasut akiliuteqarput.

- Tamatuma saniatigut ingerlatseqatigiiffiit ukiumi 2010-mi raajanut akitsuummik kr. 21.569.000-inik akiliuteqarput. Ingerlatseqatigiiffiit iluanaarutiminnit 2010-mi kr. 9.030.000-inik akileraaruteqarput, Maliina Abelsen ilisimatitsivoq.

Powered by Labrador CMS