Toqoraanermut suna tunngaviunersoq naluaat
Toqutsisoq 22-nik ukiulik eqqarsartaatsimigut misissorneqassagunarpoq, politiit naliliipput
Suli paasineqanngilaq sooq angut inuusuttoq pingasunngornermi unnuakkut silaarulluni Upernaviup avannaani nunaqarfimmi Nutaarmiuni inunnik toqoraanersoq.
22-nik ukiullip inunnik pingasunik toqutsisimanini allallu sisamat toqoriaraluarlugit nassuerpoq. Toqutani niaquisigut anaatarpai. Sulili toqoraanermut suna pissutaanersoq erseqqissinngilaq.
- Pinerlunnermi tassa suna tunngaviusimanersoq suli paasisaqarfiginngilarput, Kalaallit Nunaanni Politimestereqarfimmi pisortaq Claus Risbjerg MetroXpressimut oqarpoq.
- Pinerlussimaneq pillugu politiit paasiniaanerannut ilaavoq, nangippoq oqarlunilu toqoraasoq angut inuusuttoq qaratsamigut misissortittariaqassagunartoq.
- Tamanna suli aalajangiiffigineqanngilaq. Kisianni ima pisoqartillugu pingaartumik toqutsisoqarsimatillugu nalinginnaavoq toqutsisimasup eqqartsartaatsimigut misissorneqarnissaanik piumasaqartarneq, Claus Risbjerg oqarpoq.
Aqagu ataasinngornermi Nunatta Eqqartuussiviata naliliiffigissavaa eqqartuussiviup killisiuinermi matut matoqqanissaannik aalajangiussaa atuutinneqassanersoq. Matut ammassappata kikkut tamat periarfissaqalissapput 22-nik ukiullip eqqartuussivimmi nassuiaatissaa.
Toqutaasut arnat marluk 75-inik aamma 31-nik niviarsiarannguarlu arfineq-pingasunik ukiulik, tamarmik ilaqutariipput.
Inuit marluk toqoriaraluarneqartut ajoqqusinngillat angutilli marluk 32-nik aamma 81-nik ukiullit aqqunartiterneqarput. Nuummi napparsimavissualiaanneqaqqaarput sisamanngormalli Københavnimi Rigshospitaliliaanneqarput, tassani 81'nik ukiulik niaqqumigut pilattartippoq.