Suliffinnik sungiusarfissaaleqineq

Tusagassiiviup KNR Radiokkut aallakaatitsinerani praktikkertarneq sammineqassaaq. Aallakaatitat siullersaat ualimut sammineqassaaq

Ilinniagaqartut suliffinnik sungiusarfissaaleqipput. Tamanna qanoq iliuuseqarfigalugu Tusagassiiviup suliffinnik sungiusarfissaaleqineq raatiukkut aallakaatitassiaraa taanna ualimut KNR'ikkut aallakaatinneqassaaq. Assi: Leiff Josefsen

Sapaatip akunnerani KNR Radiomi aallakaatitassat Tusagassiivimmit suliarineqartut ilinniartut suliffimmik sungiusarfissaaleqinerannik eqqartuinertaqarpoq.

Tusagassiiviup KNR Radiokkut arfininngornermi 11. februar 2012 nal. 16.30-17.00 aallakaatitsinissaani Tusagassiivimmiit Else Olsvigip suliarai. Radiokkut aallakaatitassiami sammineqassaaq inussutissarsiutinut ilinniagaqartut praktikkerfissaaleqisarnerannut Namminersorlutik Oqartussat suliniutaat, ilinniartunuinnaanngitsoq aammali nunatsinni inuussutissarsiornermut iluaqutaasussamik siunertaqartut, Ilinniartitaanermut Ilisimatusarnermullu Naalakkersuisoq Palle Christiansen oqaloqatigaa.

- Kalaallit Nunaanni inuusuttut teknikkimut tunngasunik ilinniagaqarusuttut ilinniagartik annertunerpaamik pissarsiaqarfigissagunikku ilinniarnermik nalaani suliutigalugu ilinniakkamik ingerlatsinissaminnut periarfissaqartariaqarput, massakkullu takusinnaasagut naapertussagaanni soorlu sanasunngorniartut saffiuunngorniartulluunniit ilinniarnermik nalaanni suliutigalutik ilinniakkamik ingerlatsinissamut periarfissaat killeqartorujussuupput. Taamaattumik nunatsinni ilinniagaqartut amerlanerpaat ilinniakkaminnik naammassinninnissaat qulakkeerniarlugu ajornartorsiut tamanna iliuuseqarfiginiarparput, namminersorlutik oqartussat nittartagaat www.nanoq.gl naapertorlugu Palle Christiansen oqarpoq

Aallakaatitami Tusagassiiviup erseqqissaatigai namminersorlutik oqartussat Nunatsinni ilinniartut sungiusarfissaaleqinerat pillugu qanoq iliuuseqarniarnersut. Ilinniartut sungiusarfissaqalernissaat anguneqarnissaa kisiat pinnagu aammattaaq anguniarneqarpoq Nunatsinni inuussutissarsiortunut pitsaasumik sunniuteqarnissaa, namminersorlutik oqartussat nittartagaanni allassimavoq.

Powered by Labrador CMS