Danmarkip Pituffik sakkutuujunngitsunut ammaanniarpaa
Pituffik sakkutuujunngitsunit atorneqarsinnaasariaqarpoq, Issittumi aallartitanngortoq Klavs A. Holm isumaqarpoq
Danmarkip mianersortunnguamik USA oqaloqatigalugu aallartippaa, Pituffiup Kalaallit Nunaata avannaaniittup qanoq sakkutuujunngitsunik atorneqarsinnaanera pillugu.
Danmarkip Issittumi aallartitartaava siullerpaaq Klavs A. Holm isumaqarpoq ineriartornerup ilaatut sakkutooqarfiup sakkutuujunngitsunit atorneqarsinnaanera pissusissamisoortoq.
- Pituffimmi sakkutooqarfimmi umiarsuarnut itisoorsiutinut umiarsualiveqarpoq mittarfeqarlunilu taamaattumik USA'mik qanimut oqaloqateqarusuppugut periarfissat suunersut paasiniarlugit, Jyllands-Postenimut oqarpoq.
Naalakkersuisut siuliisa aggustimi tamanut saqqummiuppaa Danmarkip issittumi pilersaarutaa, tassani Pituffik siunissami issittumi suleqatigiinnissamut tunngaviussasoq.
Eqqarsaatigineqarpoq sakkutuujunngitsut imaatigut angalasunut sillimaniarnermik aammalu annaassiniarnermik immikkoortortaqarfigissagaat, umiarsuit takornariartaassuit issittumi angalanissamik neqeroorutillit arlaatigut ikiorsernissamik pisariaqartitsisut ornigasuarneqarsinnaassammata.
Jyllands-Posten naapertorlugu suli amerikamiunik qanoq isilluni Pituffiup sakkutuujunngitsunut ammarneqarsinnaanera pillugu isumaqatigiinniarnerit aallartivinngillat. Ukiuni qaangiuttuni USA'p radari pisoqalisoq nutarterpaat, taanna sakkutooqarnikkut illersuinermut ilaavoq.