Politiit: Marlunnik ukiulik ulorianartorsiortoq

Politiit maanna saqqummiuppat Nutaarmiuni alianartumik pisumi, pisut ilaat amiilaarnarluinnartut

Nutaarmiut. Assi: Sermitsiaq.AG'p toqqorsivia

Sooq toqussappat?

Apeqqut taanna kikkut tamarmik Kalaallit Nunaanniittut apeqqutigigunarpaat, avannaani nunaqarfiit ilaanni Nutaarmiuni ippassaq pisumi susoqarsimaneranik paasissutissat saqqummiunneqarnerisa kingorna.

Minutsialuit matuma siorna politiit nalunaarutigaat nukappiarannguaq marlunnik ukiulik toqoraasumit toqunneqartussaagaluartoq. Sulili politiit ilisimatitsissutiginngilaat nukappiarannguaq qanoq ililluni inuunerminik ulorianartorsiorsimanersoq.

Tusagassiivinnut nalunaarutikkut politiit qanittumi nassiussaani ima allassimasoqarpoq:

- Inuit marluk politiit paasinninnerat naapertorlugu toqunniarneqaraluartut tassaapput arnaq 24-nik ukiulik nukappiararlu marlunnik ukiulik. Taakkua imminnut ilaqutariissut tamarmik ajunngillat.

Manna tikillugu politiinit paasissutissarsiariuminaappoq kikkut toqutaasimanersut. Paasissutissalli taakku maanna ingerlateqqinneqarput.

Arnat marluk aappaa 75-inik aappaalu 31-nik ukiulik toqutaapput. Niviarsiararlu arfineq-pingasunik ukiulik. Taakkua pingasut imminnut ilaqutariipput.

Politiit siusinnerusukkut ilisimatitsissutigaat toqoraasimasutut pasisaq 20-nik ukioqartoq. Toqoraasimasutut pasisaq 22-nik ukioqarpoq. Politiit manna tikillugu paasiniaaneri tunngavigalugit toqutsinerit pingasut inunnillu sisamanik inuariaraluarnerit pillugit unnerluunneqarluni. Ullumi siusinnerusukkut Upernaviup Eqqartuussiviani killisiorneqarpoq.

Unnerluussisut kissaatigigaluarpaa eqqartuussineq matut ammatillugit ingerlanneqassasoq, eqqartuussisulli aalajangiuppaa illersuiusup kissaateqarneragut, tusarnaarniat eqqartuussivimmit anisinneqassasut.

Taamaaliornikkut kikkut tamat - maannamut - paasitinneqarallarnavianngillat suna tunngavigalugu pinerluttuliorsimanersoq. Soorlu paasissutissarsiarineqarsinnaanngilaq 22-nik ukiulik unnerluussutinut taama ilungersunartigisunut qanoq oqaasissaqarnersoq.

Politiit matut matuneqarnerinut akerliupput, eqqartuussisullu aalajangiinera Nunatta Eqqartuussivianut ingerlateqqinneqarpoq, kingusinnerusukkut naliliiffigineqassalluni unnerluutigineqartup nassuiaataa kikkunnut tamanut takusassiarineqassanersoq.

Politiit naapertorlugit unnerluutigineqartup toqutaminut attuumassutai suli qulaajarneqanngillat.

Politiit aamma ilisimatitsissutigaat aqqunarujussuarsimasut ullumi Københavnimi Rigshospitaliliaanneqassasut, soorlu Sermitsiaq.AG'p siusinnerusukkut allaaserereeraa. Pineqarput angut 81-inik ukiulik, taanna suli inuunerminik ulorianartorsiorpoq. Angutip aappaa politiit ilisimatitsinerat naapertorlugu aamma Danmarkimut timmisartuunneqartussaq 32-nik ukioqarpoq. Paasisat uppernarsaatissaqanngitsut naapertorlugit kaattamik anaaneqarsimanermi kingorna nukillaarsimavoq.

Aamma takuuk tallimanngornermi Sermitsiaq, toqutaasunik naammattuuisup nassaarnerminik oqaluttuaa.

Powered by Labrador CMS