Persorsaasumik toqutsisorisaq tigusaraat

39-nik ukiulik sisamanngornermi ullup qeqqata siorna Randersimi tigusarineqarpoq. Perorsaasumik toqutsisimasutut pasisaavoq. 39-nik ukiulik Ane Sofie Heilmannip erneraa, anaanaq 1951-imi meeqqat 22-t allat peqatigalugit Danmarkimut aallartitaaq

Perorsaasoq 46-nik ukiulik uani toqutaavoq. Polfoto: Ernst Van Norde

Østjyllands Politi Ritzauimut ilumoornerarpaat perorsaasumik 46-nik ukiulimmik Judy Meiniche Simonsenimik toqutsisimasutut pasisartik tigusarisimallugu. Tigusarinninneq sisamanngornermi ullup qeqqata siorna Randersip silataatungaani pivoq, 39-nik ukiulik Kristian Heilmann politiinit biilimik qimaaniarsarigaluarnerata kingorna.

Aqquserngup sinaaniittumut orpimmut apornermi kingorna ikilertiterpoq Aarhus Sygehusimi peruluttut inaannut innartitaalluni. Inuunerminik ulorianartorsiornersoq oqaatigineqanngilaq. Annertuumik ikilertiterpoq, Per Bennekov, Østjyllands Politinit pigaartoq oqarpoq. Perorsaasoq 46-nik ukiulik pingasunngornermi Hald Sø'p kujataani Viborgip kujatinnguani orpippassuarni nassaarineqarpoq. Kingullermik takuneqarpoq, Blåkærgård Viborgip silataatungaaniittoq Kristian Heilmann peqatigalugu qimammagu, taanna tassani najugaqartuusoq.

Skoda silvi-qasertoq ingerlatigisaat pingasunngornermi Aarhusimi nassaarineqarpoq. Sisamanngormalli Østjyllands Politi, Skodamik silve-qasertumik allamik Hadstenimi Aarhusip qanittuaniittumi tillittoqarsimaneranik nalunaarfigineqarput.

Biilimik piginnittut angut biilimik tillittoq takuaa, politiinullu qanoq isikkoqarnera oqaluttuarimmagu politiit isumaqarput tassaasoq taanna toqutsisimasorisartik. Taamaattumik Aarhusip eqqaani politiit Skodanik silvi-qasertunik alapernaaserput.

Nalunaaqqutaq 9.40 Øster Bjerregravimi Randersip eqqaani Skoda politiinit takuneqarpoq unitseriarneqaraluarluni. - Politiit biiliat takugamiuk qimaariaraluarpoq, sivikitsumik politiinit malersorneqareerami ajutoorpoq aqquserngullu sinaaniittumut orpimmut aporluni, Per Bennekov oqarpoq. Politiit Skodamik aquttoq kinaassusersivaat, tassaasoq taanna ujaarisaasoq.

Midt- og Vestjyllands Politi, toqutsinermik misissuisuupput, taakkualu oqaatigerusunngilaat qanoq ililluni Judy Meiniche Simonsen toqunneqarsimanersoq. Sisamanngornerup ingerlanerani toqungasup timaanik misissuinerup kingorna oqaaseqarsinnaapput. Ilimagineqarporli toqutsineq aattaqaqisoq. Taamaannissaa ilimagineqarpoq sikuerniap illuaraata silataani 46-nik ukiullip timaanik nassaarfiup eqqaa aattaqaqimmat.

Powered by Labrador CMS