- Nanertiallaqaagut

"Naalakkersuisut nanertiallassutigeqisaminnik ilisimatinneqarput Upernaviup eqqaani nunaqarfimmi Nutaarmiuni inuit arlallit inuunerannik naleqartumik alianaqisumillu pisimasoqarsimasoq"

- - Pisimasoq quarsaarutigeqaarput, pisimasoq nunaqqataasunut eqqaaniittunullu annertuumik sunniuteqassasoq qularutiginngilarput, Naalakkersuisut Siulittaasuat Kuupik Kleist oqarpoq. Assi: Jørgen Chemnitz

Naalakkersuisut siulittaasuata, Kuupik Kleistip, ullumi Nutaarmiuni inuit pingasut inuunerannik naleqartumik allallu marluk aqqunartiterujussuarnerannik pisimasoqarsimanera ima oqaasertalerpaa.

- Naalakkersuisut siulittaasuat, Kuupik Kleist;
- Pisimasoq quarsaarutigeqaarput, pisimasoq nunaqqataasunut eqqaaniittunullu annertuumik sunniuteqassasoq qularutiginngilarput. Naalakkersuisut sinnerlugit Qaasuitsup Kommuniani borgmesteri Jess Svane ualimut attavigivara, misiginneqataanitsinnik tassuunakkut tusartillugu, Kuupik Kleist allappoq.

Pisimasoq pillugu, tassungalu tunngatillugu qanoq iliuuseqarsimanermik, maanna qanoq iliuuseqarnermik qanorlu iliuuseqassamaarnermik Naalakkersuisut Politiiniit aamma Peqqinnissamik Aqutsisoqarfimmiit ualimut ilisimatinneqarput.

Ikiortissat
Nunaqarfinni peqqinnissamik sullissisut Nutaarmiut eqqaanniittut Peqqinnissaqarnermik Aqutsisoqarfimmiit ilisimatinneqarput innuttaasunut pisumut tunngatillugu oqaloqateqarnissaminnik atorfissaqartitsisunut ammassasut.

Tasiusami ajoqi Upernavimmilu palasi maanna Nutaarmiunut ingerlapput. Ilagiit qanoq iliuuseqarnerannut ataqatigiissaarivoq Avannaani Provsti, qanorlu iliuuseqarnissaq annerusoq atorfissaqartinneqarpat tamanna pillugu aalajangiineq pissaaq Ilaqutariinnut, Kulturimut, Ilagiinnut Naligiisitaanermullu Naalakkersuisoqarfik kiisalu Nunatsinni Biskopip Allaffia peqatigalugik.

Innuttaasunut pisumik alianartumik eqqorneqartunut telefonikkut oqaloqateqarsinnaaneq ullumimiit ammarneqassaaq, taannalu ullup unnuallu ingerlanerani ammasussap normui tassaapput: 59 74 35 aamma 58 56 93

Nalaataqarnerlunnermi tarnikkut ikiueqqaarnerup ataqatigiissarnera Ilaqutariinnermut, Kulturimut, Ilageeqarnermut Naligiissitaanermullu Naalakkersuisoqarfiup aamma Qaasuitsup Kommuniata suleqatigiinnerisigut ingerlanneqarpoq.

Pingasunngornermi ataatsimiinnissaagaluit taamaatippaat
Pisimasumik nalaanneqartunut, ilaqutaasunut nunaqqataasunullu misiginneqatiginninneq takutikkumallugu Naalakkersuisut ullumi pingasunngornermi ullup sinneranut ataatsimiinnissat tamanut ammasut tamaasa taamaatippaat.

Powered by Labrador CMS