Qaannamik pinnanniassapput
Qaannamik 110 kilometerinik parruteqataarusuppit? Paartoq juulimi ingerlanneqarpat ilaanissannut periarfissaqarputit
Qaannamik parrunnissaq Paartoq 2012 juulip 14-ianni aamma15-ianni ingerlanneqalerpat apuuttut siulliit pingasut aningaasannattaassaqarput.
Kalaallit qajaannik aputtumut siullermut 20.000 kr.-it, apuuttup tullianut 15.000 kr.-it apuuttullu pingajuannut 10.000 kr.-it.
Qallunaat qajaannik peqataasoq apuuttoq siulleq arnaq angulluunniit kisimi akissarsiassaqassaaq. Akissarsiassaq 15.000 kr.-iuvoq aaqqissuisut kalaallit qajaannik ingerlaarniat pingaartinnerummassuk.
Peqatigiiffik Qajaq Paamiut, Peqatigiiffik Narsalik aamma takornariaqarnermut siunnersorti Helga Lorentzen aaqqissuussisuupput, Paamiuni aamma Narsalimmi aallartoqartassaaq, ullut appassaanni uterluni. Paarfissaq 110 kilometerisut takissuseqarpoq.
Paamiuni qaannanik plastikkiusunik attartornissamut periarfissaqassaaq, tamaani aamma Qaannamik unammersuarneq ullut marluk sioqqullugit ingerlanneqartussaavoq, taamaammat neriuutigineqarpoq Paartoq 2012-imut nunanit allanit peqataaniartoqassasoq.
Unammisitsinerup taaguutissaa aamma oqallisaasimavoq isumaqatigiissutaalluni unammiuaarnissaq Paartoq 2012-imik taaguuteqassasoq. Nunatta oqaluttuarisaanerani Paartoq tassaasimavoq inoqarfiit akornanni ungasissumut paarluni allakkisartartoq.