Kopenhagen Fur puisip amiinik ilanngussinngilaq
Great Greenland qaaqquneqanngilaq Kopenhagen Furip takutitsineranut, Great Greenlandip pisortaanera, Lars Berg naqissusiivoq
Puisit amiinik tuniniaaneq aatsaat taama ajornartigaaq. Naak EU'mi Inuit immikkut isigineqarnissaat akuersissutigineqarnikuusoq.
Danmarkimi amernik atisalianik tuniniaavik Kopenhagen Fur uumasuutit amiinik tuniniaanerminik iluatsitsilluartoq, kalaallit tunisassiorfiutaat Great Greenland assorsuaq ajornartorsiorpoq avatangiisinut akornutaanngitsumik aammalu imminut napatissinnaaneq eqqarsaatiga puisit amiinik tunisassiorfiusoq.
Pingasunngormat pingaartinneqartaqisoq Copenhagen Fashion Week ammarneqarmat amminik atisaliarpassuit takutissorneqarmata puisit amii ilaatinneqanngillat.
Great Greenland amernik tuniniaavimmit Kopebhagen Furimik suleqatigiinnissamik isumaqatigiissutilik, ukiumut 7 milliarder koruuninik kaaviiaartitaqarpoq Danmarkimiinnaq inunnik 20.000 sulisoqarluni.
- Taakkua amernik akitsorterussisoqartillugu amiutitsinnik tuniniaasartut ajoraluartumik ukioq manna ammaanersiorluni takutitsinerujussuarmut peqataatinniarluta qaaqqunngilaatigut, Lars Berg Great Greenlandimi pisortaaneq oqarpoq.
Great Greenland januaarimi kineserinik tunisassiortunik isumaqatigiissuteqarput Great Greenlandimit neriuutigineqarpoq puisit amiinik tuniniaaneq siunissami pitsaanerusumik ingerlanneqalissasoq.
Kopenhagen Fur'ip Great Greenland soqutiginngilaa
Qanimut suleqatigiinnissaq anguniarlugu arlaleriarluta saaffiginnissuteqartarpugut taamaattorli tassa Great Greenland takutitsinissamut peqataanissaanut qaaqquneqanngilaq.
- Novembarimi atorfinininnerma kingorna arlaleriarlunga Kopenhagen Fur saaffigisarpara, pinerilli tamaasa qisuariarfigineqarnanga, Lars Berg oqarpoq.
- Soorunami amiutigut avatangiisit eqqarsaatigalugit aammalu imminut napatissinnaanermik tunuliaqutaqarluni tunisassiat takutikkusoqaagut. Pitsaanerpaamik tunisassiaateqarpugut ukioq mannalu Isaksen Design suleqatigalugu amernik tunisassiagut nutaaliaallutillu ullumikkut atorneqartartunut naleqqupput, Lars Berg nassuiaavoq.
Kopenhagen Fur pingasunngornermi Sermitsiaq.AG'imut oqarpoq, amernik tuniniaaviup puisit amiinik ilisimasakippallaarnini pissutigalugu puisit amiinik takutitsisinnaasimanani.
Københavnimi modeugen ingerlanneqarneranut atatillugu Great Greenland Øksnehallenimi aamma Bella Centerimi tuniniaaveqarpoq.