Filmiliortartut pitsaanerusunik atugassaqartariaqarput
Kalaallit filmiliortartut aningaasaliiffigineqartariaqarput, IA-miit Sara Olsvig isumaqarpoq
Sara Olsvig Inuit ataqatigiit sinnerlugit Folketingimut ilaasortaq maanna danskit kulturministeriannut §20 najoqqutaralugu kalaallit filmiliortartut Dansk Filminstitutimit siunnersorneqarnissaminnut aningaasanillu tapiiffigineqarnissaminnut qinnuteqarsinnaanissaat pillugu apeqquteqarpoq.
Kalaallit filmiliortartui danskit filmiliortartut naligisaannik Dansk Filminstitutimut siunnersorneqarnissamut aningaasaliiffigineqarnissamullu qinnuteqarsinnaanissamut ammaanneqarnissaat ukiuni arlaqartuni IA-mit sulissutigineqarpoq. Tamanna anguneqassappat danskit filmiliorneq pillugu inatsisaat allanngortinneqarnissaa pisariaqarsinnaavoq.
- Maannakkummi kalaallit filmiliortartut aatsaat danskinik suleqateqarunik siunnersorneqarsinnaallutillu taperneqarsinnaagamik. Kalaallit filmiliortartui inatsimmut ilaalersinnaappata tamanna allanngortinneqarsinnaassaaq.
- Ukiuni kingullerni kalaallit filmiliornikkut suliaqartut amerliartorsimapput, tamannalu nuannaarutissaavoq, Nunatsinni Dansk Filminstitutitut ittumik peqannginnatta filmiliortartuvut siunnersorneqarfissamik aningaasaliiffigineqarfissamillu amigaateqartarsimapput. Suliap tamassuma iliuuseqarfiginissaa ajornarpallaanngitsutut isikkoqarpoq kalaallit filmiliortartut tapersersorneqarsinnaalernissaat anguniarlugu, Sara Olsvig oqarpoq.
2008-mi apeqquteqarpoq
2008-mi IA-p taamani Folketingimut ilaasortaatitaa Juliane Henningsen danskit kulturministeriannut apeqquteqarpoq, taamanilu akissummi erserpoq danskit filmiliorneq pillugu inatsisaannut Kalaallit Nunaat Savalimmiullu ilaanngitsut.
Taamanikkulli IA-p suliniut ingerlassimavaa suliaqarnermilu maluginiarneqarsimavoq danskit folketingimi filmiliornermut inatsiseqarnermut isumaqatigiissimasut akornanni inatsisip allanngortinnissaa tapersersorneqartarsimalluni.
- Suliap pitsaalluinnartumik IA Folketingimimit piareersarsimaneqarnera kiisalu Mimi Karlsenimit aamma ingerlateqqinneqarsimanera pissutigalugu kulturministerimit ajunngitsumik akissuteqarfigineqarnissatsinnut isumalluarpunga, Sara Olsvig oqarpoq.
- Allagaatitsinni takusinnaavarput kulturministeriaqarfimmit aaqqiisoqarnissaanut ammasoqartoq ajornartorsiullu ilisimaneqarluarsimasoq. Kulturministerimit akineqarnissara kiisalu qanittukkut ataatsimiinnissatsinni suliap massuma eqqartornissaa qilanaaraara.