IMAK-ip mattussinera unioqqutitsinerunngilaq

Ippassaq marlunngornermi IMAK-ip siulittaasuata Sivso Dorphip nalunaarutigaa marsip aallaqqaataaniit ilinniartitsisut kattuffiat mattussinissamik ilimasaarisoq.

Mattussinerup kingunerissavaa IMAK-imi ilaasortat marsip aallaqqaataata 2012-ip kingorna kommunini Namminersorlutik Oqartussanilu atorfinitsinneqarsinnaajunnaarnerat

Pingasunngornermi ullaakkut KANUKOKA-p siulittaasuata Martha Abelsenip aningaasaqarnermullu naalakkersuisup Maliina Abelsenip oqaatigaat IMAK-ip mattussinissamut ilimasaarutaa tigusimallugu.

- Kommunit Naalakkersuisullu paasivaat illuatungeriit tunngaviusumik isumaqatigiissutaat atuuttoq naapertorlugu tamanna unioqqutitsinertaqanngitsumik alloriarnerusoq. Kommunit Naalakkersuisullu paasivaat isumaqatiginninniarnerit unitsinneqanngitsut illuatungeriillu aaqqiagiinngissutaat annertuseriaraluartoq isumaqatiginninniarnerit ingerlatiinnarniarneqartut, tusagassiuutitigut nalunaarummi allassimavoq

- Kommunit Naalakkersuisullu isumaqatiginninniarnernut ingerlasunut tunngatillugu kissaatigisimavaat ilinniartitsisut sulinerminni piffissaq annertunerusoq ilinniartitsinernut atortariaqaraat. Kommunit Naalakkersuisullu qularutiginngilaat meeqqat atuarfianni atuartut ilinniartitsisut ilinniarsimasut ilinniartitsisoralugit annertunerusumik ilinniartinneqartalernerisigut atuartut nukittuneralutik ilinniaqqinnissaminnullu periarfissagissaarnerullutik meeqqat atuarfiat qimattassagaat. Kommunit Naalakkersuisullu isumaqarput ilinniartitsisut ataasiakkaat piffissaq ilinniartitsinernut atortagaat qaffanneqarpat meeqqat atuarfiani angusaasartut pitsaassusaat qaffatsinneqarsinnaassasoq.

IMAK-ip ilimasaarinera ajuusaarutigaat
Martha Abelsen aamma Maliina Abelsen oqarput kommunit naalakkersuisullu paasigaat ilinniartitsisut sulinerminni piffissaq annertunerusoq ilinniartitsinermut atortussaappassuk suliassanut allanut piffissakinnerussasut.

- Naalakkersuisut ilinniartitsisut allanik suliassaqarnerat pingaartutut isigaat, kommunitulli isumaqarlutik ilinniartitsineq ssuliassaanni pingaarnerpaasoq. Taamaattumik neriulluarfigineqarpoq meeqqat atuarfiata pitsaanerusumik ingerlalersinnaanissaa meerartatta ilinniartitaaneranut iluaqutaasumik. Naammassisaqartarnerup pitsanngortinnissaanik piumasaqarneq tamakkiisumik unammilligassaavoq inuiaqatigiit tamakkerlutik ukiuni makkunani peqataaffigisariaqagaat inuiaqatigiinnilu susassaqartut tamarmik anguniarnerani peqataaffigisariaqagaat.

Annertunerusumik oqaaseqarusunngillat
- Kommunit Naalakkersuisullu IMAK’ip mattussinissamik nalunaaruteqarnera ajuusaarutigaat pingaartumik kommunit aamma Naalakkersuisut isumaqatiginninniarmata anguniarlugu meeqqat atuarfiani atuartut atuartinneqartarnerisa pitsanngortinneqarnissaat, Martha Abelsen aamma Maliina Abelsen oqarput.

Erseqqissarpaallu ”kommunit naalakkersuisullu isumaqatiginninniarnerit ingerlatillugit pisunut kingullernut annertunerusumik oqaaseqarnianngitsut”.