- Isiginnaaginnarusunngilagut

- Ukiorpassuunngitsut qaangiuppata utoqqaat uagutsinnit amerlanerulerpata uagut tassaavugut pilersuisussat. Maannangaaq aningaasaqarneq qulakkeertariaqarparput, anguniagaqarluta suullu tamaasa atorlugit.

Kaalinnguaq Siegstad, Siumut Inuusuttaasa siulittaasuat allappoq:

Taakkua pilersorneqarnissaat aammalu kinguaassatsinnik pilersuinissamut nunatsinni nammineq isumalluuteqarpugut aningaasanik isaatitsiviusunik. Tamakkua siulitsinnit kingornutaraavut, Siumup inuusuttaanit, SIS'imit naalakkersuisut kaammattussavagut aatsitassat nunanit allanit suliffeqarfiutilinnut tunniussuinerat pillugu.

Ullumikkut naalakkersuisut pilersaaruteqanngillat aatsitassanik piiaasunit akiliisitsisarnissamik - akiliut siunissami aningaasartuutaalerumaartussanik qulakkeerinnittussaq. Tamanna SIS'imit ilungersunartutut isigineqarpoq naalakkersuisullu ilisimatikkusuppagut ernumassutigut tusaaniaqqullugit, Kaalinnguaq Siegstad oqarpoq.

Aningaasaqarneq
- Siumup Inuusuttunut Suleqatigiiffiani ernumassutigaarput siunissami utoqqalinersiutisisussarpassuit pillugit akissaaruteratarsinnaanissarput. Uani tunngavigilluinnarlugu aatsitassarsiornermi nunatsinniit piiakkat akileraaruserneqanngilluinnarniarnerat, taamatut inissisimasoqartillugu nunat saniligut eqqarsaatigeqaagut.

- nuna manna siulitsinniit tunissutisiarput uaguusussaavugullu pisuussummut tassunga salliusussat.

- Uani eqqarsaatissarigatsigit, uagut kalaalliuvugut nunatsinnik piginnittut uaguuvorlu oqartussat nunatta iluanaarutiginiarneqarnerani, Kaalinnguaq Siegstad allappoq.