Kiffartuunneqarnissamut toortaagit
Innuttaasunik sullissivik www.sullissivik.gl allartilluarpoq
Tallimanngornermi innuttaasunut kiffartuussivik nutaaq Nunatsinni atorneqalersoq tassaavoq sullissivik.gl. Nittartagaq imminut sullissivittut suliaavoq Namminersorlutik Oqartussat aamma kommunit pillugit paasissutissarpassuaqartoq, immikkoortunut nalunanngitsumik isikkuminartumillu aaqqissuussaq.
Nittartakkap atornissaa ajornanngitsunnguuvoq nalunarani paasissutissarpassuarnillu imaqarluni. Najugaqarnermut uppernarsaatit, piniarnermut allagartat, akileraartarneq, innarluutillit allarpassuillu. Nittartakkamik atuinikkut telefoninik nuutitseqattaarnerit pinngitsoorneqarsinnaalerput aamma innuttaasunik sullissiviup saaffigisinnaasat allat innersuussutaanik ivertitsisimammat.
Tassunga iserniaranni soorunami qarasaasiaq mobililuunniit pisariaqarput.
Siunissami qinnuteqaatit toqqaannartumik sullissivik.gl'imut nassiunneqarsinnaanngussapput. Taamanikkussamulli Nem-ID (nammineq ilisarnaatigisassaq) pisariaqassaaq, nammineq atsiortarnermut taartissatut. Nem-ID'ip atulinnginnerani qinnuteqaatit allallu qangatut inummit nammineq atsiorneqartarallassapput.