Kalaallit nerisassat amerlanerit
Nunatsinni sulisitsisut peqatigiiffiat suliat akimorlugit nerisassanut sammivilimmik attaveqatigiiaanik pilersitsiniarpoq
Suliffeqarfiit Kalaallit Nunaanni Sulisitsisut Peqatigiiffiannut attuumassutillit sunik suliaqarneri apeqqutaatinnagit nerisassanut sammivilimmik suleqataanissamik soqutiginnittut 1. marts 2012 ataatsimiinnissamut qaaqquneqarput.
Kalaallit nerisassaataannik tunisassiornerup pisisartunullu siammarterisarnerup annertusarneqarnissaa nerisassat pillugit Kalaallit Nunaanni Sulisitsisut Peqatigiiffiata suleqatigiissitaliornikkut suliniarfigissavaa.
Kalaallit nerisassaataasa nunami pisisartunut tuniniagassanik tunisassiortoqarnerulernissaa anguniarlugu 2010-mili Kalaallit Nunaanni Sulisitsisut Peqatigiiffiata suliniuteqarnini annertusalerpaa. Nerisassat pillugit Kalaallit Nunaanni Sulisitsisut Peqatigiiffiata suleqatigiiffiliorneratigut, ileqquliunneqarsimasunit allaanerusumik nerisassinik tuniassiortut, tuniniaqqitassanik pisiortortartut, akunnittarfiit neriniartarfiillu kiisalu assartuisartut angallassisartullu angusaqarfiusumik oqaloqatigiinnissamut periarfissinneqassapput.
- Taamaaliornitsigut neriuppugut ineriartornerup ilorraap tungaanut saatinnissaanut tunngavissat pitsaanerusut pilersissinnaallutigit, taama oqarpoq Kalaallit Nunaanni Sulisitsisut Peqatigiiffianni pisortaq Henrik Leth.
- Pingaartuuvoq nerisassanik tunisassiortut, tuniniaasut atuisullu nerisassat pillugit suleqatigiit sulineranni peqataatissallugit. Qinikkanik, atorfilittanik, nerisassat pillugit oqartussanik ilinniarfinnillu suleqateqarluarnerput ingerlatiinnassavarput, taakkumi tamarmik kalaallit nerisassaataannik pissarsisinnaasut amerlanerulersinniarlugit suliaqarnermi pingaaruteqarput. Suliamut tamatumunna Kalaallit Nunaanni Sulisitsisut Peqatigiiffiat sulisuminik sulisitsissaaq, tassami kikkulluunniit takusinnaavaat silamut anillakkaanni inuussutissarsiutinik piorsaanissamut periarfissarpassuit utaqqiinnartut", Henrik Leth oqarpoq.
Kalaallit Nunaanni Sulisitsisut Peqatigiiffiata nerisassat pillugit suleqatigiiffia 2012-ip ingerlanerani aaqqissuussinissanik arlalinnik pilersaaruteqarpoq, suliniuteqarfigisami ullumikkorpiaq pisut aallaavigalugit saqqummiinertalinnik oqallitsitsisoqartassaaq.
Suleqatigiit siunertaraat tigussaasunik inassuteqaasiornissartik – soorlu assersuutigalugu kalaallit nerisassaannik tunisassiortut nuna tamakkerlugu qarasaasiakkut katersuiffeqalernissaannik pilersitsineq, taanna ima taaguuteqartillugu "The Market Place".