Skip to main content

Palle, uukapaatitsiniaaqqipputit

IMAK-siulittaasua Sivso Dorph, ilinniartitaanermut naalakkersuisoq Palle Christiansen, oqaaqqissaaqqippaa, kisitsisaatai kukkunerarlugit 

Naalakkersuisoq Palle Christiansen naapertorlugu kisitsisit takutippaat, nunatsinni meeqqat atuarfianni ilinniartitsisut suliffigisassatut piffissamik 28 procentiat kisiat ilinniartitsinivimmut atuartunillu sullissinivimmut atortarpaat, kisitsit Danmarkimi 40 procentiusoq.

Taamaattumik sulissutigerusullugu kisitsip qaffasinnerulernissaa nunatsinni ilinniartitsisut atuartut akornanni sulinerulersillugit. Taamaaliortoqassaaq atuarfimmi qimatsisut piginnaasaqarnerunissaat qulakkeerniarlugu.

Ajornartorsiulli uaniippoq Palle Christiansenip ilisimasaminik tusarliussaa kukkusumik tunngaveqarmat.

Taama oqarpoq Sivso Dorph, siulittaasoq ilinniartitsisut kattuffianni, IMAK. 

- Siullermiilinngilaq Naalakkersuisunut ilaasortap ataatsip isumaqatigiinniarnerit nalaanni allassimanngitsumik malittarisassamik unioqqutitsinera, tassalu tusagassiutitigut isumaqatigiinniassanngitsigut. Tamannalu aamma Palle Chritiansenimut siullermeerutaanngilaq, Sivso Dorph akersuukkusuummeqqavoq.

- Palle Christiansen, Sermitsiami allaaserisaqattaakkatit malinnaaffigisinnaavavut, atuartartunillu pututitsiniaallutit ingerlatsivutinaasiit. Ilaatigut atuarsinnaavarput IMAKip ilaasortani kisiisa eqqarsaatigigai atuartullu pinnagit. Soorunami ilaasortavut pingaartippavut, suliffimmiminimmi pitsaasunik atugassaqartitaappata tamanna atuartunut pitsaasumik sunniuteqartussaavoq. Ilisimanerpiuk massakkut isumaqatigiinniarnitsinni neqeroorutigisimasavut suunersut, tusagassiutinut taamatut oqaaseqarsinnaagavit. Ilisimanerpiuk siunnersuutigisavut suusupagineqaannartarmata sipaarniuteqartoqarusummat pitsaassuseq pinnagu, Sivso Dorph oqarpoq.

- Nalliuttorsiorpalaartunik misinnartitsinermi Naalakkersuisut oqaaseqartuaannartarput Kalaallit Nunaanni kattuffinnik suleqarusullutik, kattuffiit inuit oqartussaaqataanerannut pingaarutilimmik inissisimasuummata. Taamatut oqariartuuteqartarneq Naalakkersuisumut Palle Christiansenimut atuussimanngilaq, taannami nittartakkani imminut nittarsaannissaminut pisariaqartitsinerusimammat, atuarfiup soqutiginnittaanik oqaloqateqarnissaminiit. Naalakkersuisunngoqqaarnermini inuugujooqatigiinnermiit Naalakkersuisoq Palle Christiansenip IMAK'imik oqaloqateqarnissani soqutigisarisimanngilaa, Sivso Dorph isumaqarpoq.

- Kalaallit Nunaanni ilinniartitsisumut kommunemit immikkut suliakkerneqarsimanngitsumut sulinermut piffissamik atuisarnitsinnut isumaqatigiissuuput atuuttoq malillugu agguaqatigiisillugu ukiumut 728 nalunaaquttap akunneri atuartitsissutigineqartarput. Kalaallit Nunaanni ilinniartitsisut, aningaasarsiortutut allatuulli, ukiumut suliffigisarpai nalunaaquttap akunneri 1784-it, sulinngiffeqarfissat nalunaaquttap akunneri 200-it kiisalu nalliuttunut sapaassuarnullu nalunaaquttap akunneri 96-it peereeraanni. Tassa imaappoq ilinniartitsisoq, atuartitsinerinnarmik sulialik agguaqatigiisillugu procentinngorlugu piffissap suliffimi procentia ima annertutigisoq atuartitsinermut atortarpaa: 728 nal. ak. / 1784 * 100 = 40,81 %.

Palle Christiansenip oqaatigaa, nalinginnaasumik ilinniartitsisoq suliffimmi 28 %-ia atuartitsinermut atortaraa. Taamatut nalunaaruteqarneq eqqunngilluinnarpoq. Suna siunertaajuk taamatut kisitsisinik asersuunneqarsinnaanngitsunik pututitsiniaqattaarninni? Palle Christiansenip oqaluttuussinnaanerluta suliassat suut ilinniartitsisut suliarissannginneraat?, Sivso Dorphimit oqaatigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER