Greenpeacemut tunniutiinnassaagut?

Anthon Frederiksen kissaatigaa Greenpeace'p Kalaallit Nunaanni inissisimanera oqaluuserinerussagipput

Anthon Frederiksen. Assi: Leiff Josefsen

- Greenpeacekkut nunatsinni piniartut inuussutissarsiornerannut assorujussuaq ajoquseereerlutik aamma aatsitassarsiornissamut olie-siornissamullu tunngatillugu qanoq iliornissatsinnik/iliuuseqannginnissatsinnilluunniit aaliangiisuusorissavagut?

Anthon Frederiksen, taama Kattusseqatigiit Partiiat sinnerlugit allappoq aamma nunatsinni oqalliseqarnerunissamik kissaatilik

- Taamaattumik uumasunik illersuiniaqatigiit (Greenpeace-ip) – maannakkut assigiinngitsutigut sunniiniarsaraluni suut oqaluuserissanerivut pillugit nammineerluni qulequtseeqattaarluni iliuuseqaqattaarnera, sakkortuumik apeqquserparput, minnerunngitsumillu nunatsinni inatsisinik unioqqutitsilluni akerliussutsimik takutitseqattaarluni, aamma tamatuminnga sioorasaaruteqarluni inuussutissarsiutigisinnaasatsinnik akornusiiniarnera Kattusseqatigiit Partiianiit akuersaarsinnaanngilluinnarparput, Anthon Frederiksen oqarpoq.

Greenpeace'p Kalaallit Nunaanni inissisimanera sunniutaalu oqaluuserinerunissaat kissaatigalugu, qinersisartut taassuma sammineqarnissaa ujartortarmassuk.

Powered by Labrador CMS