Nukissiorfiit ikililereqqippoq
Nukissiorfiit nalunaarutigaa innaallagissamik, imermik kiassarnermillu pilersuisoq 18,7 million koruuninik sipaartariaqarluni - sulisut qulit soraarsinneqarput
- 2012-mut aningaasatigut inatsimmi Nukissiorfinnut tapiissut, tassa politikkikkut akinik annerpaaffissaliisimaneq kiisalu aalisakkerivinnut tapiissutit, 10 mio. koruuninik annikillilerneqarsimapput. Ukiuni 2013, 2014 aamma 2015-mi ukiut tamaasa 10 mio. koruuninik annikillilerneqartarnissaat naatsorsuutigineqarpoq.
Marlunngornermi ualikkut Nukissiorfiup pisortaanera Henrik Estrup tusagassiorfinnut ualikkut allappoq.
2012-mut aningaasatigut inatsimmi Nukissiorfinnut tapiissut, tassa politikkikkut akinik annerpaaffissaliisimaneq kiisalu aalisakkerivinnut tapiissutit, 10 mio. koruuninik annikillilerneqarsimapput. Ukiuni 2013, 2014 aamma 2015-mi ukiut tamaasa 10 mio. koruuninik annikillilerneqartarnissaat naatsorsuutigineqarpoq.
- Malitsigisaanik Nukissiorfiit ernianut nalikilliliinernullu annertusiartuinnartumik nanerneqarput, erniaanaat eqqarsaatigissagaanni 2012-mi 50 mio. koruuninik annertunerulersussaallutik. Tamanna tunngavigalugu Nukissiorfiit 2012-mut aningaasatigut missingersuummi 18,7 mio. koruunit ileqqaarutigisimavaat, Henrik Estrup ilisimatitsivoq.
Sulisut 10 soraarsitasut
- Taamaattumik Nukissiorfiit ukiuni aggersuni annertusiartuinnartumik tunisassiarineqartut akikinnerpaaffissaminiitinneqarnissaanik piumasaqarfigineqassasoq qularnanngilaq taamatullu aningaasartuutit minnerpaaffissaminiitinneqarnissaat ilanngullugu.
Tamatumunnga atatillugu Nukissiorfinni pisortat suliffeqarfiup sananeqaataa sukumiisumik misissoqqissaarsimavaat, suliffeqarfiullu suliassaviisa aallunneqarnerulernissaat sulissutigilersimallugu. Tamatumunnga ilaapput suliassat naammassiumallugit piginnaasat suut pisariaqartinneqarnersut.
Tamanna toqqammavigalugu Nukissiorfiit qullersaqarfiat aalajangersimavoq suliassat arlallit allanut suliaritilerniarlugit ilutigisaanillu akikillisaaniarluni. Tamatuma malitsigisaanik ullumi sulisut qulit atorfeqarunnaarnissaanik siumoortumik nalunaarfigineqarsimapput ilutigisaanillu aalajangerneqarluni atorfiit arlallit inuttassarsiuunneqassanngitsut, Henrik Estrup oqarpoq.
Soraarsitsisoqaqqissanngilaq
- Taamak aaqqissuussaanerup naleqqussareerneratigut pisortat naliliipput qullersaqarfimmi ikilisaasoqaqqissanngitsoq. Pisortat naatsorsuutigaat sulisut maanna atuuttut eqqarsaatigalugit pisariitsumik aningaasartuutinullu naleqquttumik Nukissiorfiit suliassavii aallunneqarsinnaasasut, annertunerujartuinnartumik suliffeqarfiup suliassavii qitiutinneqarlutik, Henrik Estrup nassuiaavoq.
Nukissiorfiit tusarniaanerup ingerlanerani sulisut pineqartut Namminersorlutik Oqartussani atorfinissinnaanerat misissussavaat. Sulisut pineqartuttaaq neqeroorfigineqassapput atorfinnut qinnuteqarnissamut ikiorserneqarnissamik, oqaloqatiginninnissamut il. il.