Unnuk kulturisiorfimmi Savalimmiut sammillugu
Nunarput tamarmi nutaaliorluni Unnuk kulturisiorfimmik aaqqissuussivoq. Katuami Savalimmiut paasisassarsiorfiusinnaapput
NAPA – Nordens Institut i Grønland - takutissavaa savalimmiormiut eqqumiitsuliortup Jona Kristin Thomsenip suliaa ”Panorama kvæði Kópakonan”.
Tamanna arfininngornermi unnukkut ingerlanneqassaaq, Kalaallit Nunaanni suliffeqarfiit, peqatigiiffiit allarpassuillu Unnuk Kulturisiorfik 2012 aaqqissuullugu matuminnik ammaapata.
Assit Savalimmiuni qaqqanit immiussaapput nipitalersuisoralugu skotslandimiu erinniartoq. Takutinneqartussaq umeruarsuit pingasut atorlugit isiginnaagassiaavoq nipitalik, suliaqartup Trinity Laban Conservatory of Movement and Dance soraarummeerutaa.
- Takutitassiaq Katuap inersuaaraani Nuummi Unnuk Kulturisiorfiup aaqqissuunneqarnerani ilaatinneqartoq. NAPA'mi matut aamma 19-imiit 21-mut ammassasut, NAPA allappoq.
Suna peqataaffigiartussanerlugu nalugukku uani isumassarsiorsinnaavutit.
Sapaatip akunnerata naanerata ingerlanerani Sermitsiaq.AG asserpassuarnik takutitaqarumaarpoq - sineriammit aammali Nuummit.