Skip to main content

Kina – puisinik tunisassianut periarfissaq

Puisinik tunisassiat ineriartorteqqinnissaannik naalakkersuisut piumassuseqartut kinamiut tuniniaaaviat qulakkeerinniffigineqarpoq 

- Kinamut paasisassarsiorluni tikeraarneq iluatsilluartorujussuuvoq, aalisarnermut, piniarnermut nunalerinermullu naalakkersuisoq Ane Hansen oqarpoq, taannalu Great Greenlandip Kinami tuniniaavissarsioriartornerani peqataanerminit uteqqammerpoq.

- Kinami tuniniaaviit qulakkeerinniffigineqarput puisinik piniarnerup tunisassiornerullu ineriartorteqqinnissaanik naalakkersuisut piumassuseqartut, tamannalu kinami tunisassiortut aningaasaliissuteqarnerisa nanginnissaanik aqqutissiuussisinnaavoq, Ane Hansen oqarpoq.

Amminik amminillu tunisassianik nittarsaassinermi Beijing Fur Fair 2012-imi Great Greenlandip peqataneranut atatillugu Ane Hansen peqataanissaminut Great Greenlandimit qaaqquneqarsimavoq, nittarsaassinermi peqataanermi saniatigut aamma qallunaat Beijingimi aallartitaqarfianni Shanghaimilu Det Danske Konsulatimi kinamiunik politikerinik ataatsimeeqateqarnermi peqataavoq, kiisalku Great Greenlandip puisit amiinut atatillugu niuernermi attaveqarfimminik ataatsimeeqateqartarneri malinnaaffigisarlugit.

Kinamiut soqutiginnittorujussuupput
- Malugaara nittarsaassinermik takuniaasut, Great Greenland puisinniarnerlu kiisalu Kalaallit Nunaat pilugu dvd-mik ingerlaartinneqartumik takunnissinnaasut, Great Greenlandip tunisassiaanik Kalaallillu Nunaannik soqutiginnittorujussuusut, Ane Hansen oqaluttuarpoq.

- Aamma puisit amiinik tuniniaaneq siuarsarniarlugu Great Greenlandip taassumalu Kinami suleqatigisaasa, suliniutit aallartissimasaat takuvakka. Aamma tunisassiortut, siunissami puisit amiinik atuinisamik soqutiginnissinnaasut naapippakka. Kinami suliniutit aallartinneqarsimasut naalakkersuisunit tapersersorneqartut takutillugu iluaqutaasoq takusinnaavara.

Ane Hansenip qularutiginngilaa kinamiut politikerit aallartitat ataatsimeeqataasa aamma paasigaat inuiaqatigiinnguanik Kalaallit Nunaattut ittunik suleqateqarneq nalissaqanngitsoq.

- Ataatsimiinnermi suliniutit tamakkua politikerinut ilisimaneqarnerulersippakka. Ataatsimiinnerni oqaatigaara Kalaallit Nunaat Kinamik assigiissuterpassuaqartoq, innuttaasut amerlassusaatigut tuniniaaveqarnikkulllu assigiinngissuteqartorujussuugaluartoq. Takusinnaavara Kinami tuniniaavimmi ilimanaateqartorujussuusoq, Ane Hansen oqarpoq, taassumalu Kalaallit Nunaata annertunerusumik atuisartunik tunngaveqalernissaata piviusunngortinnissaanut annertunerusumik suliniuteqarnissaq ujartorpaa.

Kalaallit Nunaannut piumasaqaatit
- Kinamiut niuernermi attaveqarfiit nalunaarutaat ersarissorujussuupput, qularutiginngilaralu tamakkua Great Greenlandip tusaatissatut tigugai. Piumasaqaatigaat pilersuinerup annertunerusumik isumannaatsuunissaa aammalu puisit amii amerlanerusut pitsaassutsimikkullu pitsaanerusut. Tassa imaappoq, puisit amiinik tunisaassiornermi aqqusaarneqartartut tamarmik puisit amiisa pitsaassusaannik pitsaanerpaanik angusaqarniaqataassapput, tamatumani ilanngullugit piniartut pisaasa passunneranni aammalu ammit suliarinerat sioqqullugu, suliarineranni kingornatigullu, Ane Hansen nassuiaavoq.
 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER