Qassinik utaqqisoqarnersoq ministeri paasiniaaffigaa
Sara Olsvigip IA-meersup nunatsinni inissiisarfinnut inissinneqarnissaminnik utaqqisut qassiunersut inatsisinik atortitsinermut ministerimut Morten Bødskovimut itisileqquaa
Qallunaat nunaanni inatsisinik atortitsinermut ministerimik Morten Bødskovimik Socialdemokratineersumik ataatsimeeqateqarnermi malitsigisaanik Sara Olsvig Inuit Ataqatigiinnersoq ministerimut arfinilinnik apeqquteqarpoq.
Apeqqutit marluk Kalaallit Nunaat pillugu ataatsimiititaliaq aqqutigalugu nassiunneqarput, apeqqutilli sinneri sisamat paragraf 20 naapertorlugu apeqqutaallutik.
- Inatsisinik atortitsinermut ministerimik oqaloqateqarnerit siulliit marluk ingerlalluarput, taamaattorli akissutisisinnaanngilara maannakkut nunatsinni inissiisarfinnut utaqqisunik ajornartorsiut ministerip qanoq aaqqinniarneraa. Taamaattumik apeqquteqarpunga neriulluga ersarissumik akisoqassassoq, taamaalilluta paaseqatigiilluta suliariaqqissinnaalluta, Sara Olsvig oqarpoq.
Kalaallit Nunaat pillugu ataatsimiititaliamiit apeqqutit:
- Suliniutit ataavartut siunissamullu ungasissumut isigisut suut inatsisinik atortitsinermut ministerip suliariniarpai utaqqisut ikilisarniarlugit maannakkut nunatsinni inissiisarfiit ammasut allilernissaannik pilersaarutit saniatigut, januaarip aallartinnerani 2012-mi utaqqisut 295-iullutik, inissiisarfinnut ammasunut inissinneqarnissaminnut utaqqisut, taamaalilluni ukiuni kingullerni inissiisarfinni ammasuni amerlavallaanik inissiisarneq iliuuseqarfigineqarluni?
- Inatsisinik atortitsinermut ministerip Kalaallit Nunaanni pissutsit qanoq iliuuseqarfiginiarpai, aaqqiiniutit ilaattut utaqqineq peqqutigalugu saammassisinnaanerup atornissaata saniatigut, Kalaallit Nunaanni eqqartuussiveqrnikkut inuit sakkortuumik inunnullu navianaatilimmik pinerlussimasut allaat qaammatit arfinillit tikillugit pineqaatissinneqartartillugit?
Paragraf 20 naapertorlugu apeqqutit
- Inatsisinik atortitsinermut ministeri isumaqarpa Kalaallit Nunaanni inissiisarfiup matoqqasortallip nutaap ammarneqarnissaa naapertuuttoq inissiisarfinni ammasuni pitsaassuseq naapertuuttoq atorneqarlersimatinnagu?
- Inatsisinik atortitsinermut ministerip isumaqataaffigaa inissiisarfiup matoqqasortallip nutaap ammarneqarnissaanik pilersaaruteqarluartoq Kalaallit Nunaanni inissiisarfinni ammasuni pioreersuni pissutsit pitsanngorsarnissaannik pisariaqartitsisoqartoq?
- Kalaallit Nunaanni inissiisarfinnut ammasunut utaqqisorpassuaqarnera inatsiseqarnikkut naapertuuttumik ingerlasoqarnerani misigisimaneq ajoquserneqarsinnaasoq ministerip isumaqataaffigaa?
- Inatsisinik atortitsinermu ministeri isumaqarpa pissusissamisoortoq Kalaallit Nunaanni pillaariaatsimut tunngatillugu inissiisarfinnut utaqqisoqarnera peqqutigalugu Danmarkimisuut saammaassisinnaanermut maleruagassat eqqunneqarnissaat?