Aasaanerani Canadamut aqqut nutaaq

Aasaru Nunatta Canadallu akornanni timmisartunik angallassineq aallartissaaq

Nuup aamma Iqaluit akornanni timmisartuussisalernissat Dash-8 34-nik inissallit atorlugit ingerlanneqartassapput. Assi: Leiff Josefsen

Aasaq manna timmisartukkut Kalaallit Nunaanniit Canadamut toqqaannartumik angalasoqarsinnaalissaaq. Air Greenland sapaatip akunneri 11- juunip 18-aniit septembarip pingajuta 2012 tungaanut Nuummiit Iqalunnut sapaatip akunneranut marloriarluni- ataasinngornermi tallimanngornermilu timmisartuussisalissaaq.

Ingerlalluassappat siunissaq ungasinnerusoq eqqarsaatigalugu piffissap timmisartuussiviusup sivitsornissaa siunertaavoq, Air Greenland nalunaarpoq.

- Niuernikkut periarfissaasorisagut pingaarnerit tassaapput sullissassat Amerika-p avannaaneersuunerusut uuliasiornermik aatsitassarsiornermillu inuussutissarsiutillit.

Ullup ataatsip ingerlanerani siumut utimullu
- Taamaammat angalanissanut pilersaarusiat Canadami ullormiit ullormut ass. Ottawa-mut, Vancouver-imut St. Johns-imut Goose Bay-imullu ingerlaqqinnissamut periarfissat tunngavigalugit aaqqissuussaapput”, taama oqarpoq Air Greenlandip niuernermi pisortaa Christian Keldsen.

Kalaallit Nunaata Canadallu akornanni sivikinnerusumik angalanissamik kissaateqartunut piukkunnartuunera Keldsenip erseqqissarpaa. Nal. ak. arfinillit inorlugit Nuummit Ottawaliartoqarsinnaavoq.

Nuummiit Iqalunnut timmisartuussinerit suluusalik DASH-8 34-inik ilaasoqarsinnaasoq atorlugu ingerlanneqassapput.

Nuummiit Iqalunnut timmisartorneq nalunaaquttap akunneranik ataatsimik minutsinillu 45-inik sivisussuseqassaaq siumuinnarlu 4.300 koruuninik akeqassangatinneqarluni.

Powered by Labrador CMS