Innuttaasut akileerujussuarsinnaapput

Kujataani Qorlortorsuarmi erngup nukinganik nukissiorfiup sananeqarnera pillugu Energikonsortiet I/S-imik isumaqatigiissitsiniartitsisarfikkoortitsinermi Nukissiorfiit ajorsassappata Kommune Kujalliup naatsorsuinera malillugu Narsami Qaqortumilu ilaqutariit tamarmik 100.000 koruunit sinnerlugit akiligassinneqarsinnaapput, akiligassaq innuttaasunut ingerlateqqinneqassappat.

Taamatut oqaluttuarpoq KNR.

Kommune Kujallermi borgmesteri Simon Simonsen nuannaanngeqaaq:

- Isumaqarpunga taamaattoqassappat tamanna maani Kommune Kujallermi innuttaasunit akuersaarneqarsinnaanngilluinnartoq. Tamanna pissappat isumaqarpunga tamanna ajorpallaartoq akuersaarneqarsinnaanngitsorlu. Ilisimaneqarmat kommunimi maani innuttaasut pilersaarusiornermut suliniummullu attuumassuteqarsimanngilluinnartut, Simon Simonsen KNR-mut oqarpoq.

Ukioq mannamiit Kujataani innaallagissamik atuisartut akinik qaffaavigineqareersimapput, tassa Qorlortorsuarmi innaallagissiorfimmut suliassami naammasseqammersumi Nukissiorfiup aningaasartuutit ataavartut matussutissaqartissammagit.

Ineqarnermut, attaveqarnermut angallannermullu naalakkersuisoq Jens B. Frederiksen malillugu Simon Simonsenimut nalunaarut imattariaqarpoq, nalunaarummi immikkut aalajangersagaqanngitsoq suliassanut isumaqatigiissutsiniartarfikkoortitanut atatillugu suliami aningaasartuutit Nukissiorfiit qanoq iliuuseqarfigissaneraat.

I