Issittup aallartitassaa toqqarneqartoq

Ukiorpassuarni nuna sullitani sinnerlugu isumaqatigiinniarsinnaatitaalluni atorfilik diplomati, Klavs A. Holm, Issittumi Danmarkip Nunattalu soqutigisai suliarissavai

Ataasinngornermi issittup nunanut allanut aallartitassaata toqqarneqartup aqqa saqqummiunneqarpoq. Ukiorpassuarni diplomatitut atorfeqartoq Klavs A. Holm, Danmarkip Nunattalu Issittumi soqutigisaanik suliaqassaaq. Assi:: Sermitsiaq.AG

Qaammatit marluinnaat qaangiupput udenrigsminister Villy Søvndal nalunaaruteqarmat, danskit naalakkersuisuisa kissaatigigaat issitup ambassadøreqalernissaa, taanna ullumi ataasinngornermi kiinnartalerneqarpoq.

Diplomat Klavs A. Holm, ullumimiit Danmarkip Kalaallit Nunaatalu Issittumi ataatsimoorussisumik sullissisorilissavaat.

Nunanut allanut aallartitap naalagaaffeqatigiit issittumi siunnerfik aallaavigalugu soqutigisaannik suliaqassaaq, danskit naalakkersuisuisa issittumi siunnerfik saqqummiutereerpaa.

Suliassaq aallartitanngortumit immikkuullarinneqarpoq.

- Issittumi ineriartorneq nunarsuarmi immikkoortortaavoq eqqissineq aallaavigalugu ineriartorfigeqqinnissaa, tamassumalu peqataaffigisinnaanera nuannaarutigeqaara, Klavs A. Holm Sermitsiaq.AG'mut oqarpoq.

Misilittagaqarluartoq
Klavs A. Holm, ukiut 30-t sinnerlugit Udenrigsministeriami diplomatitut - naalagaaffiik sinnerlugu isumaqatigiinniarsinnaatitaalluni atorfimmik ingerlatsiffigai, ilaatigut Pari, London, Singapore aamma Bruxelles'imi EU. EU aqqitigalugu Nunatsinni pissutsit ilisimasaqarfigai, taamalu nuna aamma issittoq nalunagit.

Københavnimi Asiatisk Plads nillerteruttormat nunanut aallartitanngorlaap tamaannaarnermini suut aqqusaagassariumaarnerlugit misilitsiarpaa. Nunanut aallartitanngorlaap suliassaasa siullersaannut Kalaallit Nunaannut tikeraarnissaq ilaavoq.

- Soorunami suleqatissakka ilassiartussavakka. Suliassarpassuaqarpoq. Issittumi Siunnerfik tunngavigalugu suliassiissummit aallaaveqarami, Klavs A. Holm.

Udenrigsminister Villy Søvndal aamma naalakkersuisut siulittaasuat Kuupik Kleist naapertorlugit issittumi aallartitamik toqqaaneq pisariaqartoq, nunarsuup sinnerani issittoq pillugu oqallinneq qaffasissumi ingerlanneqaqqullugu.

Nunanut allanut aallartitanngortup suliassai pingaarnerit pingasut tassaapput issittup imartaani imaatigut sillimaniarnerup annaassiniarnerullu suleqatigiissutigineqarnissaat, Kalaallit Nunaanni aatsitassat nunap iluaniittut piiaanernilu aallerinaataasinnaasut aamma issittumi innuttaasut inooriaasiannik allanngortitsinnginnissaq.

Powered by Labrador CMS